Oté

Ant tradisyon, kiltir é viv èk son tan !

Justin / 29 mé 2014

Sa in déba i dat pa dièr. Ou lé in pé koinsé ant plizir pozisyon ; abandonn pa out kiltir sétadir din sertin koté out bann tradisyon ; mé po moin, la kiltir sé osi in sertin ouvertir si sak lé otour d moin, si sak moin la lir ayièr, pétèt minm dot zépok, pokoué non ? E pi ou pé pa viv tout lo bann zafèr konm ton gran papa ou ton papa !
Po sak i konsern a moin, par egzanp, konbiinn foi mon papa la di a moin : « moin la fine fé lé miinn moin, an mon tan, a ou fé lé vot , a out manièr , zordi ! »

Moin na in kamarad, son tonton lé mor, o , né an 1932, donk li na inn bon nage(82 zan) ; li désid insinéré, fé brilé si ti préfèr.
Son bann kouzin noré émé fé véyi… : « oté, joni i réponn a zot, moin lé fatigé, tonton na lontan lé malad, moin tou sèl po okipé ; la veyi mi giny pi organizé ».
An plis, na in koté pratik dan linsinérasion( sa té pa dan nout kiltir=tradisyon) ; paré k lé moin sèr ! alé asèt in karé simtièr oua dir a moin konbiin sa i sar kout a ou po antéré ?

Minm lo notropér, jevousalumari, sa in tradision( po sak lé kroyan), mi trouv i èd po pas lo kap-sé kiltirèl-( sa sé in pé plito psikolozik, mi trouv).
Moin noré vouli fé in léloz finèb ; boug la té in kominis !
Son papa minm si té koné pa lir, té aboné Témoignages ; li té lir alanver po fé kroir li té in kouyon : mé si lo mèr ( de droit)i pas po di a li : « oté Lolo, sa la pa bon po ou so zournal la ! »

Li kab fé la réfléksyon : « bin, si oui di a moin sa la pa bon po moin, sèk pétèt lé pa bon po ou, mé po moin zistoman sé égzakoman lo kontrèr ! ».
Rèzman na ankor sé rankont po nou koz si nout pasé !
Tradisyon, kiltir, viv ék out tan, tout in programe !

Justin


Kanalreunion.com