Oté

Antansion, bann vré pirat légal i ariv pou nout gran malèr !

Justin / 27 mars 2013

Mi sort lir dann in zournal Moris, la Komision la pèsh l’Erop la fine tonm dakor avèk nout voizine, l’il Moris, pou vni fé la pèsh lo ton dan son domèn marine. Dopi 2007, i prétan l’apré négosié in l’akor konm sa, mé i trouv pa lo bout pars, solon moin, l’Erop i rod poison bradé. Pou kosa mi di sa ? Kalkil zot mèm : l’Erop i ofèr sisan soisant mil éro pou pèsh 5.500 tone lo ton. Fé in divizion, zot va oir konbien sa i fé : sa i fé 12 santime l’ero par kilo poison. Zot la bien konpri ! Na poin l’érèr la-dan...12 santime l’éro lo kilo lo ton.

Si sa i apèl pa l’ésploitasion, mi shanj mon nom. Bann péshèr morisien la fine bien konprann in n’afèr konm sa, pars sa i fé in bon bout lo tan zot i manifès kont so l’akor-la, mèm si l’Erop la aksèp azout in pti katsou par rapor zot promié propozision. In pti katsou pou boush lo zié, in poin sé tou. Mèm si bann bato l’Erop i vien ar pa pou pèsh pré d’lo bor, in distans kinz mil a popré... Moin la di bann bato ! Oui, in bann bato mèm : katrovin sis an tou. La dan na bato fransé, bato portigé, bato éspaniol épi d’ot nasionalité. Konm sa mèm banna la niabou ruine bann poison la mèr Méditérané, l’Atlantik, avèk zot gran filé i drag lo fon la mèr épi i tié vèr konm sèk.

Sak i fatig amoin ankor plis, sé ké avèk Moris épi d’ot péi, nou lé dan la COI, é si la COI nana konm vokasion lo ko-dévlopman, mi domann amoin bien pou kosa Moris i zoué pèrsonèl konm sa. Akoz ni travay pa nout tout la min dan la min pou ariv in solision i kontant anou. Ni koné, ziska zordi, bann péi nout réjion i pèsh pa troi pour san lo poison i trap dann basin l’oséan Indien. Troi pour san, sa i fé pa gran shoz ! Alor, pou kosa ni anshèv agrav nout ka ? 

Ziska zordi, l’avé bann pirat té i fé la pèsh ilégal, astèr nora bann vré pirat légal pou détrui bann rishès l’oséan, koté nou, dovan nout zié, san k’ni pé pa di arien. San k’ni konpran, bann pirat légal sar la, pou nout gran malèr !

NB : Pou ashèv fé ri la boush, si i pé di konm sa, l’Erop va done 35 éro par tone pou pèrmèt Moris défann la pèsh ilégal. L’arzan i sava gréné : 55.00X35= 192.500 éro. La i sa défrishé pou défann la pèsh ilégal la !

Justin


Kanalreunion.com