Antansyon, in médikaman i pé z’ète pli pir ké la maladi !

La Rényon i sort konète ankor in dram la mèr avèk in nouvo mortalité. Sa lé dir pou son famiy, pou son bann konésans, épi pou sak i viv dan l’antouraj la mèr. Bien antandi, in pé i rode lo résponsab... lo mèr Sin-Pol, l’Eta, lo Park marin, bann torti marine k’i apèl rokin pou pass a tab, lo viktime li-mèm... In pé i pans, zot na la solisyon tou-kui, épi zot i trouv étonan ké la pa fé arien ziska zordi. Na in pé ziska i gingn ésplik pou kosa rokin l’atak lo pov boug.

Moin la antann in-dé lésplikasyon, mé alé oir si lé vré, si lé pa ? Koméla, nou lé konm sa, si la pa in lésplikasyon syantifik, in pé rant nou i kroi pa. Si sé in lésplikasyon bizaroïd, in pé i kroi. So matin, moin la antann in madam apré di : « Kan la line i mont, rokin i désann ! Kan la line i désann, rokin i mont ! ». Donk, i fo pran prékosyon kan la line i désann. Na d’ot zésplikasyon ankor, dizon popilèr. Lé vré, lé pa vré ? In kroiyans, in lézann, in zistoir pou dor dobout ? Antansyon, i ariv défoi, kan bann syantifik i sava vérifyé in zistoir gramoun lontan, zot i apèrsoi lé pa toultan fo.

Kosa mi vé dir par la ? Mi vé dir, i fo touzour asosyé d’moun landroi kan ou i rode in solisyon ; Pou koué, pars bann syantifik, sansa bann téknokrat, zot lé for pou kozé, pou ékri, donk zot lé bien kapab fé prann aou po d’shanm pou pla kouvèr ; demoun landroi i pé di dis z’afèr, avèk pétète nèf kouyonis é in vérité. Sé so vérité-la k’i fo pa lèss shapé. Astèr, demoun i souplègn lé shoz i sava tro dousman. Zot na rézon souvan-défoi, pa toultan. Pars konm di lo kont, lo médikaman lé riskab ète pli pir ké lo maladi.

Justin