Oté

Antansyon invèrs lo dé lèt !

Justin / 6 zwin 2015

Mwin lé pa konm désértin mi vé pa rod lo pou dan la tèt domoun na pwin shové mé di a mwin, so gouvérman la, li lé a gosh, li lé inn ti pé a gosh, li lé in bon pé a gosh ousinonsa li lé pa ditou a gosh ? Sanm pou mwin konm mi antann, konm mi konpran li la finn vir kazak, la finn dévir palto. Poitan an 2012 nou la vot pou la gosh, an souvyin a zot bann zoli kozman lo prézidan si la finans, si lorop, lorop va antann a nou, zot va war sak zot va war, pi ryin sar konm avan.

Dopi, inn ti briz ni antan pi dann pié bwa, inn ti souf lo van na pi, konm si na pi ryin pou nou. A koz nou lé finn randi konm sa zordi ? I prétan sak nou té i pran pou la gosh yèr lé an mièt zordi.46 pour san fransé i dékouv ké lo parti sosialis lé pa asé a gosh, lo pli pir sé ké bann sosialis zot minm zot i rokoné pi zot parti. Anndan la néna sak i di i fo kontinié konm sa é dot i di i fo fé lo shanjman é dot ankor lé rézigné i di pou 2017 fo fé in krwa dosi.

Pou ésplik zot rotourman palto, zot i di konm sa i fo èt modèrn, i fo mèt a nou o norm fransèz (N.F). Konm sa minm mi koné in boug i fé, li fé byin dayèr. Pou zéléksyon minisipal li la prézant a li sou létikèt la gosh, pou zéléksyon départmantal li té èk l’UMP é pou zélèksyon rézyonal i prétan li sar èk objéktif rènyon. Ala in boug i koné byin adap a li konm bann sosialis. Ala in boug lé dan la norm N.F. Solman o final, aforss aforss, antansyon invèrs lo dé lèt.


Kanalreunion.com