Oté

Antansyon maryaz karp èk lapin !

Justin / 18 zwiyé 2015

Lo mèr la Ptit-il i déklar dan la prèss zédi, li lé dann brankar in kominn an fayit. Li la mèt in nan é domi pou rann a li kont. Dann zéléksyon minisipal 2014 la Ptit-il navé 8 kandida, drwat gosh konfondi. Tout té plizoumwin dakor pou di “sora difisil pou tout“ vik léta i donn pi larzan, vik léta li minm i ral lanyaz. Shakinn la aminn son kanpagn, la ral son sharèt èk pridanss, san tro fé promèss. Lo mèr, mwin pridan ké tout i déklar “Ek mwin nora pwin goumantasyon zinpo diran tout la mandatir“. Sanm pou mwin sépousa osi domoun la vot pou li. Atann pou war.

Pou zéléksyon départmantal lo mèr klété éli konm in boug do gosh, i désid fé in latlaz èk bann UMP, o diton pou gingn in moné èk lo prézidan la CIVIS, li minm prézidan UMP. Konm li di, té pa in kalkil pou fé gingn a li, té in kalkil zis pou fé gingn la vil i prétan. Zordi li rann a li kont ké lo sénatèr mèr sin pièr la mèt a li dann in gob. Li minm i di lo dil té apopré 720000 éro, té i dové tonm lèr la, la li apran pou la dotasyon solidarité cominal, pou sèt ané, oki bourik. Plis léta i raz la pint, si o mwin 280000 éro. Ek sa, la kominn lé an fayit i di.

Dann zéléksyon la di a nou, zordi, pou èt modèrn, i fo pi argard déryèr, fo argard dovan, kit a shanz shomiz pourvik la kominn i gingn larzan, vik lo prézidan la civis i komann dan lo sid, vik sé li knéna larzan nou lé oblizé kour déryèr. Zordi lo mèr lé osi vis-prézidan la Civis, èk sa li lé osi konséyè départmantal, li lé patron dolo, trakass pi pou li. Mé la kominn, kosa la kominn la ginyé dan tousala ? Inn la di “In promèss éléktoral i angaz ryink sak i akout“. An plis in promèss té fé dann in maryaz karp èk lapin !


Kanalreunion.com