Oté

Antansyon pa tonm dann révizyonism kant mèm !

Justin / 29 novanm 2013

Zot i koné Marco Ah-Kièm ? Pétèt pa, mé touléka, li mérit in détour. Sa in moun i fé bann éstati tayé dann galé. Par son bann skiltir, d’apré sak li di, li ékri dann galé listoir nout péi. Domin, dizèr d’matin, dan son kour laba l’ilèt Kinkina, Sin-Dni, li prézant son pti mizé. Sak i gingn alé oir, alé oir pars li travèrs par-an-par listoir La Rényon. Sak i gingn pa alé, fé in tour dsi internèt, tap son nom é zot va oir sak li la fé… mi pans sa i pé èt intérésan pou tout sak i èm listoir, pou sak i èm lo travay bann zartis. Bon pou sa, mé la pa tèlman pou anparl de li zordi mi fé mon modékri pars mi pans moin lé pa asé kalifyé pou parl travay bann zartis...

Kosa mi vé anparlé o-zis ? Mi vé solman koz dsi in komantèr in moun la fé dsi travay Marco Ah-Kièm. Solon li, lartis lé prizonyé la fason Parti kominis i konpran listoir nout péi avèk lésklavaz, la trèt, langazism, lo kolonyalism, la tortir, la soufrans é konpani... Mi parl de sa, pars solon moin, nana in bon kourann moun i pans konm sa, é zot, pou zot par, zot nana in vizyon pli optimis dsi listoir La Rényon. Optimis pars pou zot, lésklavaz té pa si féros ké sa, lo sistèm zangazé galman épi lo kolonyalism lamèn lo bonèr partou li la pasé. Moin pèrsonèl, mi apèl sa in kouran réaksyonèr pars pou moin, li pas son tan a kamouf in pé la vérité. Astèr, mi domann amoin si i fo done nout parti la patèrnité dsi lo kouran listoir zordi mazoritèr dan lopinyon rényonèz.... dizon sinploman, sé li la komans dévoil in pé la vérité é li la done kouraz tout sak té i vé di la vréité dsi listoir La Rényon...

Moin pèrsonèl, sé dann kouran mazoritèr mi artrouv amoin myé. Mé lé vré, kan i parl lésklavaz, langazism, lo kolonyalism, la frod dann zéléksyon, bann zanfan la Kreuz, bann gèr kolonyal, lé difisil èt optimis... Solman i fo dir, l’avé in tan, pa tro lontan, in pé té i vé kamouf listoir, gnor ali. Mèm in pé té i vé, in sèrtin lépok, ranplas vin désanm par la fèt létchi... Moin la pa aprésyé non pli kan la done lo vin désanm, nout vin désanm, konm lo zour anivèrsèr lo bien-éré frèr Scubilion. Mé listoir, tèl Parti kominis té i oi, té pa aryink sa ! Kisa, avan li, l’avé in poinn vizé optimis dsi la lang kréol, dsi nout patrimoine imatéryèl, nout maloya zordi rokoni. Lé pa késtyon, an dé mo, an dé lign, fé lo bilan kiltirèl nout parti. Pou sa, i fo in vré sobatkoz, in vré travay, in vré roshèrch, é lé pa séryé trèt in sizé konm sa par dsi la janm, konm i di.

D’in ot koté, i fo pa non pli trèt par dsi la zanm d’ot kalité manyèr oir listoir La Rényon, la manyèr mi batiz konm réaksyonèr, mé antansyon pa tonm dan lo révizyonism kant mèm ! Lo révizyonism, sa la pa bon.

 Justin 


Kanalreunion.com