Oté

Antour pa, lèss konbat bit-a bit !

Justin / 9 désanm 2014

Sominn dérièr, tout in sominn bana la bat tanbour si lo do lo dépité mèr sin lé. Konm i di, dapré lé zéko son kanar i pé èt nwa èk sa. I prétan banna la rojèt son kont dé kampagn pou zéléksyon minisipal domiltrèz, i di lavé in dépasman larzan dan lo kont é kan lé konm sa banna i rat pa ou, i rofiz lo kont, in pwin sé tou. Dikou mi konpran pa tro, poukoué i anil ryink sak lo mèr, pa lo restan d’moun d’si la lis ? Domann pa mwin poukoué la rojoté ? Déza, promièrman in pé i pé dir, i rogard pa nou, dozièmman ni koné pa koué néna dan lo dosié, si néna pou karsèr a li pou vréman konm zot i di, pou anil son zéléksyon pou vréman ousinonsa si sé in vanjans pèrsonèl kont li, konm li minm li avoué, ni pé pa awar in lavi vik ni koné pa tout.

Kont pa si mwin pou azout in nafèr la d’si ou pou mèl mon grinn d’sèl, pou lèr ni vann konm nou la ashté, ni pran tèl-kèl. Zot la konpri, si lo fon minm tir pa pou mwin pou di in nafèr, mé dopi dan la sominn, mi di a mwin an mwin minm poukoué tout lé braké si li konm sa. Poukoué ? Larb lé a tèr, shakinn i koup son bransh.konm si zot i viv in délivrans zordi, konm si tousala i ariv a pik pou rouvèr shomin pou dot ? An plis in nafèr ké mi siport pa ditou, kan mi lir zournal, lé dé pli gran sirtou, kan mi ékout la radio, mi siport pa manièr banna i maltrèt lo linformasyon. Koman banna la tonm si palto boug la ? Poitan, banna i gnor pa, néna zéléksyon rézional lané proshinn é lo mèr sin lé té vé èt kandida i prétan.

Manièr i fé éstèr, si pou vréman son zéléksyon lé anilé, li pé pi, sé pou sa néna in gro kontantman èk ban zournalis otour. Sanm pou mwin tout la antandi pou fé in lantouraz. Koué nou la pa antandi ? Apré sa néna va parl a nou, lindépandans dé la prèss.ousasa ? kèlèr ? Sé pou sa mi rodi, si po lo dépité mèr sin lé néna linkonvénian pou vréman si son kont, ispouré lé vré, lo tribinal va di, sontousèl néna lo drwa di, pa bann zournalis. Pou lo rèss konm néna in batay an vi, po zéléksyon rézional, ouk néna pétèt la finn shwazi zot klan, odrémié pou la démokrasi, évit lantouraz. Antour pa, lèss konbat bit-a-bit !


Kanalreunion.com