Oté

« Anval in mo sé gard in z’ami. »

In kozman pou la rout

Justin / 19 avril 2016

Yèr moin la donn in kozman téi di konmsa : ”Dir in mo sé ète riskab pèrd in z’ami”. Zordi mi di a mèm shoz mé in n’ot fason : ”Anval in mo sé gard in z’ami”. Koman I anval in mo, lé sinp, mèm si out lang I grat, mèm si lo mo lé dsi l’bout out lang ou I sèy évit di ali si ou i kalkil li pé fé pli d’mal ké li p ké d’bien.

Si ou i vé fash avèk in moun, avèk n’inport ki ou i pé trouv lo mo interdi : sa i fé pli mal ké gingn lo kou, sa i tyé plis k’ in bal fiziy, pars li tyé pa in moun mé li tyé in rolasyon l’amityé. Dé foi mi antann in pé dir : moin la di ali sak moin l’avé bozoin dir !

Zot i kroi sa lé vré pou vréman ? Zot l’avé bozoin dir lo mo interdi ? Moin mi pans ké non : anval ali, ou va dizèr ali ! Lès pa li alé, pars ou i koné pa déga sa i sava fé dann kèr l’ot pèrsone épi an rotour dann out kèr aou. In mo, dé mor !


Kanalreunion.com