Oté

Apré l’èr lé pi l’èr !
Lé tro tar pou tyinbo kan ou la fine fé dann out linz !

Justin / 1 séptanm 2009

Mi sort lir in zistoir i s’pass l’ané 2049, dann in péi i apèl Danemark, pa tro loin in vil té i apèl Copenhague. Akoz mi di "té i" ? Akoz mi koz o passé ? Copenhague, sa in vil i égzis, ni oi li déssi la kart ! Oui, koméla, lané 2009 oui, mé pa l’ané 2049 ! Pou kossa ? Pars klima la réshofé, la vni sho vréman pa pou zoué, i fé par-la karann-dé dégré dann in sézon i apèl printan, pars l’été, manzé i kui san mèt déssi l’fé si tèlman la shalèr i shal.
Donkalor, in madam, soisant-é-onzan, i promènn son pti zanfan. Pti marmay-la i késtyone aèl : i domann aèl si lé vré in pé o-larz dan la mèr nana in vil la koulé dann lo i apèl Copenhague, èl i di oui. I domann aèl ankor si lé vré d’ote vil la koulé galman dan la mèr, èl i aprouv. I domann ankor si in pé partou na bannzil galman la anfons dan la mèr, èl i aprouv ankor. Mé èl i di, la pa bannzil la anfonsé, la pa bann vil la koulé, mé sé la mèr la monté plizyèr dizène mètr épi la nouaye bann péi, bann vil, bannzil té pa tro déssi la otèr. El i azouté : sé dmoun la fote si nivo la mèr la monté.
Lo pti marmay, kan li aprann sé d’moun la fote, i domann son mémé pou kossa èl épi lé z’ote la pa fé aryin. Lo mémé i di, in bann konm èl la séyé, mé san gingn fé in n’afèr pars la loi la anvoy la polis pou kass matrak déssi zot kan l’avé in konférans, l’ané 2009, zistoman pou lite kont lo réshofman klimatik, épi la pa déside in n’afèr valab, la fé aryink sanblan.
Mi rakont azot sa pars sé in gayar zistoir moin lir kant in nuite somèy té i vyin pa, épi sirtou pou dir, zordi lé ankor l’èr pou fé in n’afèr. Alon fé ! Pars dann in pé d’tan, sar tro tar. Lé tro tar pou tyinbo kan ou la fine fé dann out linz. Apré l’èr lé pi l’èr !

Justin


L’ésplikasyon inn-dé pti mo :

“Té i” : i mark lo passé, dizon konm in kalité linparfé. (Marmay té i koup shomin : les enfants traversaient la rue).
Domoun mèm l’otèr : sé domoun la fote.
Somèy i vyin pa : mi gingn pa somèy.
Moin la gingn tatane : somèy la pèz amoin atèr, moin té malizé d’lévé.


Kanalreunion.com