Oté

Apré l’éspor, la politik ? Mi pans pa la politik la bézoin in moun konm sa !

Justin / 19 janvier 2013

Lé ga, mèt azot in néstan la plas bann jèn ankor marmay l’ékol. Ni pé anparl de sa, vi k’somèn proshèn, sé la rantré. Donk, mazine in pé zot lé dsi l’ban l’ékol é zot profésèr i domann azot pou fé in dovoir dsi la moral dan lo spor. Moin lé sir, in pé rant zot lé riskab èt in pé zéné dsi lé z’antournir. Dan kèl éspor ? Tout biensir, mé sirtou dann siklism profésionèl. Pars si zot a bien suiv l’aktialité, mi pans gran éskandal-la la pa pas koté zot san ké zot i romark.

Zot i koné, dann siklism, tout demoun té i pans l’avé in shanpion an parmi bann shanpion, é so ga-la i apèl Lance Armstrong. Ga-la la gingn sèt Tour d’Frans, plis in bonpé gran kours. Arzout èk sa, lo ga la vanj kont in kansèr pou li arkomans kouri. An plis ké sa, li la fé in l’asosiasion pou èd bann moun nana la maladi kansèr. Sé dir si lo boug l’avé in kapital la sinpati avèk demoun dan l’Amérik, épi demoun dan l’Erop. Kèl éro lété plis kapab done bann marmay l’égzanp, lo bon égzanp, dan son vi ésportiv. Si moin lété l’ékol, moin lé sir, li nora sèrv modèl pou mon méyèr portré in ésportif, avèk in kantité bann valèr moral.

Sof ké, toudinkou, lo zoli mashine la komans déréglé. Bann sosiété k’i vanj kont lo dopaj la komans débisk ali. La tèlman sèr ali do pré ké li la ronons domann rapèl, mèm si li té i prétan li té inosan konm in pti mouton i tèt ankor son momon. La komans tir ali son tit inn apré l’ot, é na dé nuit, li a désid konfès son péshé dann in télé amérikèn (Discovery Channel). Moin pèrsonèl, moin la pa ékout lo z’afèr pars, konm di in moun, Neal Armstrong l’avé déza kas mon somèy kan li la marsh dsi la line. Dakor ! Mé moin la antann inn-dé bout l’intèrviou.

Astèr, mi pé dir azot, si moin lété l’ékol é si mon profésèr l’avé d’mann amoin pou fèr in dovoir dsi bann valèr moral dan l’éspor, moin nora déklar malad. Moin nora di mon vant i fé mal, mon tèt i sava pété. Pars, konm mi di azot, la limièr i éklèr amoin, mi koné pi kosa i fo di dsi l’éspor. Moin la antann dir, Lance Armstrong l’apré rod la rouvèrtir lo kèr bann z’Amérikin, pou artas son shomin dan la politik son péi. Mi pans pa la politik la bézoin domoun konm sa ! Ici konm la-ba, konm partou dan lo mond antié.

Justin


Kanalreunion.com