Oté

Apré la fèt, na lo landmin, é lo landmin na souvan dé foi la gèl-do-boi !

Justin / 18 novembre 2013

Isi La Rényon, dopi in sèrtin tan, na konm in grouyman dann bouyonn kiltir éléktoral. Sétaki i pans li nana la vokasyon pou èt mèr, pou èt konséyé dan bann kominoté d’komine, pou èt dépité éropéin. Sa lé vré de tou tan ? Moin la konèt in tan sa lété pa vré, vi k’té lo préfé té i désid kisa i doi zèt élu, épi si demoun té pa dakor, i fé aryin... té i sifi fé akoush la momon koshon, mèt zèf poul fé sort ti kanar, sansa pli sinploman bour lo l’irn. Donk, té pa la pèn prézanté, té pa la pèn fé in list, é si ou na lo toupé pa ékout mésyé Blan, té riskab fé tir aou out kandidatir avèk in shèk, sansa avèk in ménas mèt out vilin péshé o solèy. Mi antan d’isi in pé apré di sa lété dann tan bèzasiz (éskiz amoin pou lo kozman). Pa si tan tèlman mi pans !

Koméla, sa sé in n’afèr k’i fé pi mèm si, a s’ki paré, zanvlop i pas min an min dan la nuit. Sa lé vré pou sak nana larzan. Sa lé pa vré pou bann kandida la posh na trou. Sa la pa vré pou bann kandida mon parti. Késtyon "d’étik" !? Kosa i lé l’étik ? Sré pa la moralité sa ? Si sé sa, mi domann amoin kosa madam Bello i vé dir kan èl i rofiz la kandidatir madam Fruteau pou in késtyon d’étik. Konm di lo kont : soi èl i di tro, soi èl i di pa asé, pars bann zéléktèr nana in vilin défo, zot i vé konèt lo fin mo, é si zot i koné pa réèlman, zot i shèrch pétèt, zot i invant an partann lo prinsip : "Fourmi i marsh d’sou la tèr, kréol i koné !"...

La pa tousa la ! Ni koné kant mèm dann kèl éta La Rényon i lé, ni koné kant mèm kèl kalité la tablatir nou lé d’dan. Lo pli lojik, dan in sityasyon konm sa, sé ké toulmoun i donn la min pou tir anou dan so lanboulkidi. Pars na kant mèm in zour i apèl domin ! Ni vyinn mèt anlèr sèt dépité, ni sava mèt vinn-sink mèr, sépa konbyinn konséyé bann kominoté d’komine, i sar ronouvèl nout roprézantasyon éropéène, étsétéra, étsétéra, é apré sa, pou fé avans kèl plan — in plan Marshall, mi pans pa ? Lé vré, an parmi, na poinn mazisyen ! An parmi, na poin bann zonm providansyèl. Apré la fèt, na lo landmin, é lo landmin nana bien souvan dé foi la gèl-do-boi.

Justin


Kanalreunion.com