Oté

Apré lo bouraj l’irn, lo bouraj dé krane

Justin / 4 désanm 2015

Bann z’ansien la bien konète lo bouraj l’irn. L’avé mèm in kozman pou sa : téi di, fé akoush in momon koshon si tèlman bann trui i fé bonpé lo pti. Ziska dann lé z’ané 1970 sa té in n’afèr téi fé konmsa. Kosa zot i di ? Sa dann tan lontan ? Di pa tro for pars i pé krenn lo tan lontan, in zour i rovien. Touléka i fo kant mèm véyé pars konm i di, i mète pa lo shat pou avèy sosis. Tout fason, koméla, isi La Rényon na in bon bout tan k’i fé pi in n’afèr konmsa !

Donk zéléksyon lé onète, démokratik, indiskitab ? Mi pans i fo pa ni sava ziské la. Zot la pa antandi dir kandida na lo moiyin pou moiyéné i aroz ? Pa avèk dolo, mé avèk l’oro. Zot la pa antann dir ké tazantan na inn-dé kandida i fé promès é apré i réspèk pa : in pti kontra ! In lozman ! La sab avèk siman. Moin la vi, dovan inn-dé kaz in ta la sab dépozé par sépa kisa, mé sa i rès la ziskatan la plui i fane ali. An atandan li sé in bon wc pou lo shat. Donk, solon mon poinn vizé zéléksyon la pankor ariv konm savon k’i lav pli blan.

Nana osi la manipilasyon. Mi antan dir, dann bann z’antiy na in kandida la port sé plint pars lo sondaz lé pa konform konm k’i dovré… I fo alé dann z’antiy pou oir sa ? Non va, Isi osi i fotografyé l’opinyon momandoné-konm i di « l’instan t ». Pou aranj lé shoz lo journalis i donn son l’opinyon dsi pou koué inn la monté, l’ot la désann, li tras mèm i trazéktoir. Kroiyé moi é fouté vou d’dan !

Konm di in bon kamarad : « lontan l’avé lo bouraj l’irn, zordi na lo bouraz dé krane ». Konm nou la vanj kont inn, i fo ni vanj kont l’ot.


Kanalreunion.com