Oté

Apré lo uityèm kongré, Shakinn rant nou, pran son kostime amontrèr, pou amontré !

Justin / 9 zwiyé 2013

Sak konm moin la parti uityèm kongré nout parti épi la rogard télé, mi pans zot la fé konm moin in romark : Si dmoun i baz dsi télé, lé sir zot la pa aprann granshoz dsi parti kominis, épi la pa konprann granhoz dsi nout kongré... Pétèt zot va di amoin lé normal, vi k’na arienk in pti tan pou shak lévènman. Zot i pé dir osi, pou konprann in n’afèr, i fo sak la prézant lévènman zot mèm la konprann kékshoz dann nout parti épi dann son listoir, dann son zidé. Arzout èk sa, si ou la poin in minimom lanpati pou kékshoz, ou i konprann pa. Si ou i konprann pa granshoz, ou i pé pa tro bien éspliké, zot la konpri amoin ? La pa bézoin, mi donn détay.

Solman na in loson, mi pans ni doi tiré. Sé koué lo loson ? Sé ké si ni vé demoun i konpran épi i partaz nout zidé, i fo pa ni baz dsi lé zot, i fo ni baz par nou mèm. In légzanp ? Parti kominis la ékri son program épi la donn shak kongrésis in légzanplèr. Mé si lo kongrésis i arlir pa lo zafèr a-fon, mi pans pa sa va rant tousèl dann son tèt. Si li vé fé konprann demoun, i fo li sar éspliké, é pou li éspliké i fo li sava oir dmoun, koz èk demoun, fé konprann lé shoz. Si ni baz dsi lé zot, lé pèrdi par avans.

Biensir, zot va dir zot i pèy so télé-la, donk zot na droit in sèrvis kalité, donk i doi anparl azot La Rényon, son vi, son listoir, son lékonomi. Pétèt sé in n’afèr ki fo prévoir pou l’avnir mé pou zordi lé pa konmsa. Donk, mi pans, shak militan i doizète in lamontrèr, pou amontr son famiy, son kamarad sak la gingn la shans aprann dann nout parti. Alor, shakinnn rant nou ! Pran nout kostim amontrèr épi an avan.

Justin


Kanalreunion.com