Oté

Aprésa pou lo dimansh, na war !

Justin / 31 désanm 2015

Dann in ti néstan, lané 2015 i ariv o bout, ansiénman, pou kas la blag gramoun navé labitid di pou lo 31 “A swar batay silvés èk zanvié“ pou byin fé konprann lo sanzman èk larivé la nouvèl ané. Pou nou zordi, désertin i di lané 2016 i sar pa èt in bon lané pou travayèr vik lo kalandrié i anons lo promié mé, lo wuit mé èk lo vinn sink désanm, in dimansh, in lané pa pou vréman an lavanraz travayèr i di.

Déza lané 2015 li minm té pa in bon lané pou travayèr pa par rapor lo kalandrié, mé pa rapor la lwa Macron. Zot i an souvyin mwa d’out 2015 lo minis lékonomi makron la désid fé i lwa pou fé travay domoun lo dimansh. Sépousa i apèl konm sa é i port son nom. Lo minis i di konm sa, sé pou rolans lékonomi, alé war, bann syndika èk travayèr i dénons in rokil sosyal.

Dann la lwa Macron navé pwin aryink lo travay du dimansh, lavé dot shoz, sak la fé di bann zopozan, la lwa lé fé pou lo patron, lé fé pou lo médéf i di. Lo minis i di, fo èt modèrn, konm si travay la nwit, travay lo dimansh sé èt modèrn. A mwi mi di pou èt modèrn i fo déza awar in travay, zis in travay, in travay pou tout. Sépousa, pou mon bann, pou 2016, pou sak i atann mi souèt a zot avan tout, touv in travay. Aprésa pou lo dimansh, na war !


Kanalreunion.com