Oté

Arèt krétik bann shomèr !
Lé onté sak i di dsi zot !

Justin / 20 février 2013

Matante Zélida la ékrir Justin :
Mon shèr nové, mon spès salté,
Mi sort antann la méyèr dan l’ané. Kosa moin la antann ? Moin la antann dir, Rénioné, sirtou bann jèn, i rod travay. I fo pa prann demoun pou dé bourik, pars si lé vré bann Rénioné i vé larzan, zot i vé pa forséman travay. Sa in n’afèr bann idéalis i pans, mé sa lé pa vré. Demoun i vé larzan, mé zot lé pa paré pou forsé épi alé rod ali. In légzanp ? Zot lé pa pré travay dir pou alé gingn so larzan-la. Zot lé pa paré pou fatig azot pou alé dékrosh in diplom profésionèl. Konbienn foi moin la antann dir, kan la komine i anbosh sis pèrsone pou koup zèrb, inn i fé lo guétèr pou oir si shèf sèrvis i vien pa. Kat i zoué bolot é lo dèrnié i dor dan la kabine kamion, é sa lé bien vré. Tok ! Pran sa pou toi !

Justin la fé pou répons :
Mon vié matant k’i koz touzour la boush rouvèr,
Si lé vré ké demoun i vé pa travay, vi pé dir amoin pou kosa plis san-soisant mil pèrsone lo nom lé marké Pol anploi ? San-soisant mil pèrsone, sé inn dsi troi an az pou travay. An plis ké sa, rod travay sar talèr pli dir ké travay. Lé pa vré ? Mi koné désèrtin jèn i lèv la nuit, ou sinon sa i arèt bloké zot kaz samdi épi dimansh pou alé rogard dsi bann fishié si na poin in travay pou zot. Parl pi zournal : toultan i fouy sa, toultan i rod la-dan, toultan i ékri dsi l’internèt. Solman i trouv pa mèm ; Matant, dan l’tan k’vi koz, shomaj l’avé poin ? Demoun té mal péyé, sa lé vré, donk trouv travay té pa in n’afèr difisil. L’avé travay pou toulmoun, parl pi pou sak na diplome, in pé partou l’avé bézoin azot, é sèt-la té bien péyé par kont. Alor, siouplé, arèt babiyé konm sa, arèt fé koz la boush pou arien ditou. Arèt krétik bann domandèr travay, pars koméla, zot lé viktime pou vréman, é sak i di dsi zot, kroi amoin, lé onté. Tok ! Pran sa pou ou !

NB : Lé ankor pli onté kan i larg zandarm èk la polis dsi zot, olèrk rod bon solisionn travay pou zot.

Justin


Kanalreunion.com