Oté

Arète fé konm martin kikouzi !
Lé tan, zot i kroi pa ?

Justin / 18 février 2013

Not péi na in bon roprézantasion nasyonal ! Mi pans pa in moun va di lo kontrèr. Nou nana sèt dépité. Nou nana kat sénatèr. Mi pans nou la bézoin o moins sa pou fé in bon présyon dsi gouvèrnman épi pou sèy trouv in solisyon. Solman nana in problèm : ni antann pa tro bann dépité-la pou fé avans bann bon solisyon. Mi vé pa dir zot i koz pa, mé konm in pé i di, zot na poin ziska zordi in parol k’i port dann l’opinyon épi i gingn mète in pé la présyon dsi gouvèrnman.

Nana dabor bann zéli sosyalis. Zot lé nonbré... sèt si mi tronp pa... si i kont bann dépité épi lo sénatèr, épi ankor in dépité éropéin. Solman, konm i di, bann zéli sosyalis sé in bann zéli godiyo. Sak zot i koné bien fèr sé fèr konfyans lo gouvèrnman, trouv lésplikasion sak li fé. Kréol i diré zot i pran lintéré gouvèrnman. Mèm si zot i koné la politik gouvèrnman i tir ar pa nou dann la difikilté, ni dann dé z’ané, ni dann troi, ni dann kat ni dann sink... Zot i kroi tèlman zot gouvèrnman ké kan i domann zot avi zot i done pa, zot i déranj pa pou doné, zot i anvoy mèm pa in modékri. Nana bann zéli la vièy droit : dé sénatèr kant mèm sé pa arien, mé i antan pa lo komansman di débi d’inn propozisyon pou La Rényon. Nana Thierry Robert, l’onm na poin son lang dann son posh : li lé tousèl, son parti na in sèl dépité, mé li osi li propoz pa gran-shoz sof a fèr romark ali par son bann kozman, par son manyèr li égzèrs son manda. Na Huguette Bello : èl la promète in program pou La Rényon, mé konm sèr ann ni oi pa arien vénir èl la promète in loi dsi la vyolans kont bann fam, mé èl la pankor gingn dépoz sa dsi la tab lo prézidan : an onz z’ané èl la pa gingn lo tan. Nana Paul Vergès : i pé pa di li propoz pa, i pé pa di li lé pa réaktif dsi bann problèm rényoné, mé pou l’instan li lé tou sèl pou fé sak li fé. Nana in dépité éropéin Younous Omarjee i kroiz lo fèr san arété pou k’Lerop i tourn pa lo do bann péi l’outre-mèr épi bann moun lé dan la mizèr.

Moin pèrsonèl mi èmré bien tout bann zélu sak na in manda nasyonal, é i koz pa ziska koméla, i fé konète zot poinn vizé. Sirtou, zot i komans par arète fé konm martin kikouzi ; lé tan, zot i kroi pa ?

Justin


Kanalreunion.com