Oté

Arète kritik nout maloya ! Siouplé !

Témoignages.re / 15 zwiyé 2011

Mon shèr nové, mon spès salté,
M’a dir aou in n’afèr. Zot i komans fatig amoin avèk zot maloya. Toultan maloya, maloya… I diré k’zot nana arienk sa dann zot tète. I diré ké sa sé lo sèl mizik nana La Rényon. Touléka zot i fé konmsi na arienk sa dann lo péi. Zot la fine obliy séga don ? La pa arienk sa. Bann z’ansien té i èm dans dann salon. Zot téi èm galman la polka, la mazurka, la vals étsétéri-étsétéra. La fine obliyé don ? Ou sansa i mépriz ? La-ba lil Rodrig, sansa dann Sésèl, bann demoun i dans bann dans-la dannn salon. Sa lé konpri dann zot patrimoine é mi pé dir dan la n’ot ossi. Dann tan lontan, nout gro papa épi nout gro momon, san konté nout bann gro tonton épi gro matant la dans sa, kisoi dann bal salon, kisoi dann bal la pousyèr. Koméla, par la fote bann rouj-de-fon, la fine obliy nout patrimoine mizikal. Pour sir, zot nana arienk kaka kabri dan la tète. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Pèrsone la pa di nana arienk maloya La Rényon. Pèrsone la pa di nana arienk sa k’i konte. Lé vré maloya lé marké par l’UNESCO konm patrimoine mondyal l’imanité, mé lé vré ossi ké séga sa i apartien nout patrimoine a nou Rényoné. Mé kossa i lé so fasson ésèy abès lo maloya pars na d’ot mizik issi ? Maloya, nana in mérite, sé ké bann gran zartis la mète ali anlèr épi in bon lékip demoun la MCUR la nyabou bien fé valoir ali par l’UNESCO. Sak i vé na ka sèy fé parèy pou lo séga. Akoz pa ? Nout séga i mérite bien k’i défann ali, k’i mète ali anlèr galman, épi pétète k’i mark ali dann patrimoine l’imanité. Akoz pa ? Zour-la, moin lé sir nana in bonpé kréol va bate la min, pars si ni èm nout maloya, ni èm ossi nout séga... Pou lo rèst, kisoi la polka, kisoi la mazurka, kisoi d’ote ankor, mi pans sa nou la anpréte déor, é mi pans pa séryèzman ké sa i pé ète nout patrimoine. Solman, lé possib li té kréolizé... donk sé in n’afèr a oir. Mé assé kritik nout maloya siouplé !

Justin

NB : ousa ou i mète lo rap, lo régué épi lé zot mizik ? Sa ossi i zoué issi. Nana bon mizisien i konpoz sa issi. Alor sa ossi nout patrimoine ? Sa i diskite sa !

 Justin 


Kanalreunion.com