Oté

Arète oir arienk l’ékime épi rogard in pé la mèr !

Justin / 26 févrié 2014

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
Si mi konpran bien zot osi zot lé parèy tou lé z’ot. Kan i ariv in zéléksyon tout kalité l’alyans lé bon pou fé. L’èr-la, i koné pi kisa lé dsi la gosh, kisa lé dsi la droit, i mète tousa dann marmit épi i tourn sa an zanbrokal. Pou sa mèm, moin la lir dann in zournal l’umpcr lé né : i pran bann moun l’ump i mète dsi bann list kominis é désèrtènn foi i pran bann kominis é i mète sa an misouk dsi bann list la droite... Mé z’ami, koman zot i vé ankor demoun i konpran so manzé koshon-la ? Aprésa, étone pa si bann zéléktèr i sava pi voté, si konm di lo kont lo parti i gingn sé sak i sava la pèsh lo zour d’ lo votaz... Di amoin franshman : lé pa méyèr moun la droit i rès a droit é moun la gosh i rès la gosh ? karnaval shakinn son band ! Tok, pran sa pou toi !

Justin la fé pou répons :

Mon vyé matant k’i koz touzour la boush rouvèr,
Ou i rogard l’ékime é ou i oi pa la mèr.Pou kosa mi di sa ? Dabor inn, koman demoun i pèrsoi la gosh zordi, sak lé la-ba dann gouvèrnman ? Sanm pou moin lo gouvèrnman Hollande i amèn pa in politik dann l’intéré bann ti kolon. L’apré si tèlman raz la pint demoun ké la kriz, konm i di, i sava ankor rogoumanté : donk va mète in frin pa posib avèk nout dévlopman, i diminyé ar pa lo shomaj épi va grosi lo kantité d’moun mizèr. Bann klignotan la kriz va éklèr plizanpli rouj fonsé. kisa i ri la-dan ? Bann éspékilatèr, bann gro sosyété sak i produi moins pou gingn plis larzan l’épékilasyon. Si ou i vé bien matant, mi pans Hollande l’apré mète son pyé dann soulyé Sakozy. Pou fé in shomin ankor pli an bob pou lo pèp. Alor, sèryèzman, d’apré ou, i fo donn ali kouraj pou fèr sa, sansa i fo di ali : "Tansyon pangar, sa i kol pi sa koko !". Moin pèrsonèl mi pans konmsa.

Donkalor, i fo réini tout bann bone volonté sak lé pa dakor avèk l’ansien politik la droit, épi sak i di lo nouvèl politik la gosh lé pa bon non pli. Lo méyèr téknik sé lo rasanbloman. Rasanbloman avèk ki ? Inyon avèk ki ? Avèk demoun momandoné i ariv a pans konm ou é i oi in pé l’avnir konm ou mèm, ou i oi. L’inyon avèk ou mèm, sé in ropliyman dann out kokiy-la pa in politik l’inyon, la pa in bon n’afèr ditou, é an plis, i ansèrv de riyin... Mi pans, mon vyé matant, mon kozman va ède aou arète oir arienk lékime é bien rogard la mèr… Tok ! Pran sa pou ou !

 Justin 


Kanalreunion.com