Oté

Arien, plis arien, plis arien égal arien ditou !

Témoignages.re / 25 mars 2011

Dann l’antouraj La Rényon, nana in bonpé péi moin na la konsidérasyon pou zot. Nana gran péi, épi nana pti péi. Aprésa, nana déssi la tèr in bann péi mi koné pliz-ou-moin. I vé pa dir zot nana in plas a-par dann mon kèr, mé mi pé trouv azot déssi in kart épi mi koné kossa i fé zot répitasyon. I pé pa dir in l’amatèr foutbal i koné pa lo Brésil. I pé pa dir, non pli, in moun i suiv bann révolisyon i koné pa Cuba, sansa d’ot péi ankor. Dépi mi intérès nout rasine, mi koné bann péi nout zansète i sort la-ba, sis plas a pépré. Dizon l’Erop, dizon ankor l’Afrik, l’Inn, la Shine épi Komor, Madégaskar... mi arète la, pars nout tout i koné ousa nout z’ansète i sort.

I paré Konsèy réjyonal nana plis k’in pti fèb pou l’Australi. Mé pou moin, pèrsonèl, sa in l’androi étranj. Tan k’a Adélaïde, mi koné pa li, mi konfèss a-zénou. Moin té i kroi té in shanson i nonm : "Madémoizèl Adélaïde !". Donk, zot i rapèl, na poin lontan, in gran délégasyon Konsèy réjyonal la parti la-ba pou partisip in féstival. Mi rapèl ossi, lo prézidan la Réjyon la si tèlman ramas mantèr, in pé plis la guèr mondyal i pète.

Sa i anpèsh pa zot alé arfé la fète la-ba, avèk in bann z’invité, k’i di pa non, provi k’na pou boir é pou manzé. I di pa : « L’otèl i rofiz pa gourman » ?. É gourman, sa i mank pa, sirtou si zot i ranpli zot vant dann nout posh. Pars sé nou k’i pèy sa. La pa fé la MCUR, mé l’apré gaspiy lo larzan, ziska k’in zour déssi lé z’antournir i mank di santime pou fé in l’éro. So zour-la, kossa va fé ? So zour-la, kossa va di ? Va goumant z’inpo biensir, mé pou la po patat, pars sanm pou moin, avèk lo larzan, i fé pa arien d’in pé konsékan. Konm di lo kont : « Arien, plis arien, plis arien égal arien ditou ».

 Justin 


Kanalreunion.com