Oté

Arsèlman skolèr ? In késtyon grav, in andikap pou marmaye lékol

Justin / 14 novanm 2017

JPEG - 43.6 ko

Zédi lété lo zour lo arsèlman dann l’ékol. Akoz in zour pou sa ? Pars d’apré sak i paré dan la Frans in marmaye dsi uit lé arsélé dann l’ékol. Dé foi mèm, bann jennn arsélé i fini par suisidé. Si i suisid pa, lo arsèlman i anpèsh z’ot siksé dann z’ot zétid épi dann la vi.

Pou kosa ? Pars z’ot kamarad lékol i bord azot, i trète azot tout sort nom, i kass azot ti boi dsi lo tan skolèr. Na dé foi, na dé marmaye i gingn lo kou, mé kan zot i gingn pa lo kou zot i gingn doulèr dann z’ot am é sa sé in doulèr i pass pa fasilman.

Moin la pa vi bann shif dsi lo arsèlman dann l’ékol isi La Rényon, mé sé in n’afèr k’i mank pa. Ni pé d’mandé ousa sa i komans ? Sa i pé komans dann la famiy, kan i krétik inn, i krétik l’ot é lo marmaye i fini par konsidèr sa konm in lésé pasé pou arsélé. Si mon papa, si mon momon i krétik tèl tèl famiy akoz moin osi mi krétikré pa lo zanfan bann mounla. Anpliské sa, akoz mi domannré pa mon bann kamarad pou fé konm moin.

Pars si nana dé foi in zélèv i pé arsèl in n’ot, la plipar d’tan lo arsèlman i pratik an group : kan plizyèr marmaye i désid rann la vi in n’ot inposib. I désid épi i ariv pars a plizyèr ou lé pli for k’ tousèl !

Arzout èk sa, lo arsèlman i pé alé loin konm moin la di, ziska lo suisid lo arsélé é sa sé in n’afèr i ariv dann l’ékol sansa son l’antouraz plizyèr foi dann l’ané. Kan sa i ariv, pèrsone i konpran pa, pars pèrsone la pa vi épi la pa vouli oir. Mèm lo paran lo arsélé i konpran pa. Si lo marmaye i sava anplégné lo répons lé paré : sa zistoir rant marmaye é gran-moun i mèl pa d’sa.

Ziska, konm mi di azot i ariv in n’afèr grav é tout demoun lé dézarmé.

La famiy na poin lé zarm pou lité ! L’ékol na poin lo moiyin k’i fo pou lité ! La sosyété an zénéral na poin non pli lo moiyin k’i fo ! La loi alor, Ousa la loi i sava trouv lo moiyin pou vanj kont lo arsèlman. Sa i rosanm in pé la vyolans kont bann madam i sibi : na poin arien pou zistifyé sa ! Moralman sa lé kondanab ! Mé la bo dir, la bo fèr, sé in n’afèr k’i arète pa zamé, sansa kan lé tro tar.