Oté

Arvaz pa gèp dan son ni !

Justin / 3 septembre 2013

Dimansh o soir, moin la bien rogard Paul Vergès dann télé ; li la anparl désèrtèn shoz bien intérésan, o sinonsa bien trakasan... sirtou kan sa i sort dan la boush in moun i koné bien sak i apèl la jéo-politik. Trakasan pars, momandoné, la parl la Siri, é si té i falé la Frans i mèt son né la-dan, sinon i fo èl i tienbo in pé a l’ékar.

Pou Paul Vergès, lo Moiyin-Oryan, sé in poudriyèr lé paré pou éklaté, é tout sak i pé fèr, sé agrav ankor lé shoz. Lo tantine té i vé antrèn ali dsi la késtyonn moin la fine anparlé, lo bon èk lo mové kan. Pou nout kamarad, dan sèt afèr, na poin in bon avèk in mové kan. Asad, sé in diktatèr, é toulmoun i koné. Lo bann z’advèrsèr, sé in bann fondamantalis, é tout l’androi zot i mèt zot né, sé problèm par dsi problèm... arzout èk sa, na konm in gèr d’rolijyon : mizilman kont mizilman, sunit kont chiit... Mèt son né dann in n’afèr konm sa ? Konm la fé dan l’Afganistan, dan l’Irak, dan la Libi… ni konpran bien sé in avantir avèk bann landmin i déshant. Pou la Siri, lé riskab èt parèy, sansa pli pir ankor.

Romark bien, firamézir in pé i san l’ay. L’Almagn la di i fo pa kont dsi li. Bann dépité z’Anglé la donn zot promyé minis in rès trankil. Obama, li mèm, la di i fo li koz èk son bann sénatèr épi son bann dépité. Bann Fransé lé pa dakor èk in l’intervansyon. In pé i di lo prézidan i doi pran l’avi bann dépité èk sénatèr. Dan la mèr Méditérané, bato d’gèr tout nasion i frol inn avèk l’ot. Lo diktatèr la Siri i bat dsi son l’éstoma pou di li tyé douz, li blès katorz. La konfizyon mi di azot, in vré gépyé !

Mé konm di lo kont, lé pli préférab : "Arvaz pa gèp dan son ni !".

Justin


Kanalreunion.com