Oté

Aryin pou déklaré : dizon martin ki-kouzi !

Justin / 4 août 2009

I prétan dir, kan marmay lontan té i koude lo déyèr in zoizo martin, sète-la té i tonm malade, té i koz pi. Sa i fé pa pans azot in n’afèr sa ? Sa i fé pa pans azot in pé manyèr fé bann roprézantan la droite, sak i amène la politik pou lo prézidan La Frans issi La Rényon ? Pou moin, oui !
Kan lo prézidan Sarkozy la déside fé bann z’éta-zénéro pou loutre-mèr, toute la kalkil son parti, son bann gran dirizan, té i sava pran sa konm drapo pou dir kossa zot i pans déssi l’avnir nout péi. Byinsir, kan lo shèf i déklansh bagar, son troup i suiv ali, konm in sèl onm, lo pti doi déssi la koutir lo pantalon. Mé nou la pa vi aryin ! Nou la pa antann aryin ! Kan — domann pa moin pou koué ? — méssyé Fillon la vni La Rényon, la fé in sort mèss déssi z’éta-zénéro dann Tampon, Didyé Robèr la di kat ti-mo, in diskour kourt, avèk in bann z’idé ankor pli kourt. Mé, kant-mèm, in pé d’moun la mazine lo dépité-lmèr té i sava rante dann ron, épi di sak li nana pou dir, fèr sak li nana pou fé. Aryin ! Aryin ditou ! Sansa bann télé nora bate tanbour plis k’i n’an-fo. Bann zournal la droite nora bate tanbour galman pli for k’i pé, pars rozoir vide i fé bon pé dézord !
Kan lé dé prézidan, konsèy zénéral épi konsèy rézyonal, la déside fé in gran sobatkoz déssi lo z’éta-zénéro, lo bann méyèr roprézantan la droite dan nout péi la shap dan lé kane, la défilé, la pa vni inn tiork, pars, pars, non va ! Pars aryin ditou ! Pou raport, la poinn rézon. Sof pétèt, zot i trouv pa aryin pou dir déssi l’avnir nout péi, nout pèp, son zénès, son bann shomèr, sak lé ilétré... Non, aryin pou dir ! Aryin pou déklaré ! Dizon zot la fé konm martin ki-kouzi.

Justin


Kanalreunion.com