Oté

Asé bour koko d’moun

Justin / 2 octob 2014

Banna i donn lo mo mi pans ? An so moman nana lo fèyton Sarko. Si ni lir zournal, sinonsa ni ékout radio oubyin si ni rogard télé dérnié tan, mèm séga mèm dans partou. Ni pé pa pass koté é nyoré, ni antan in sèl son. Lo son ofisièl konm i di dan la ot. Lé insinifian oté. La komansé par Sarko va rovni byinto, la kontinié avèk Sarko rovyin tou de suit é la zordi sé Sarko lé la présantman. Domin alorss ? Zot i suiv byin zot la, li lé partou, li lé in l’andrwa zot lé la, li sar pèt in kou ayèr, i roswa a zot, i ging pi sanpasé lé konm moush vèr si in ta la soumir. Mé lo pli gro trakasman pou nou, i di la pwin lo shwa, sora konm sa ziska 2017, nora Sarko èk Marinn, in pwin sé tou,
difisil fé mié, la finn désidé mi di a zot, lo rès alé zoué kadok ou alé fé pèt bèf. Na pi aryin pou fé, i sa an avwar in gro van d’apré zot an 2017, mèm sosialis i sar gouté, sora baléyé. Lé kab arivé pou vréman si i kontinié so trikmardaz la. Mwin, déza mi komans èt ragoulé, na gingn la foir baya èk so l’intoksikasyon. Arèt babyé.

Sa in bann a par sa. Zot i fé, zot i défé, zot i rofé i apèl a zot lo katrièm pouvwar. Zot rol a zot i dovré pou donn a nou l’informasyon san parti pri, sak lé sir, sak lé vré, san trikaz a nou va sépar lo grin èk l’ivré, konm i di, konm sa ni gingn port in zisman sitoyin i tyinbo dobou si lo nafèr, ni gign fé pèt in largiman, fé travay nout l’imazinasyon. Apréla ni gingn fé nout proférans par nou mèm. Sinonsa si nou la pwin tout lé tonan, na azi si lo kou, nou va fié si sak domoun i di, si la rimèr dann shomin, va shavir nout l’espri é sora pli fasil pou fé aval a nou koulèv fin d’kont.

Kanta nou, ni atannra pa 2017, nou lé prévni, ni koné koué i fo fé. Pèrd pa lo tan, gingn pa la kangn, ni kontinié konstri nout paviyon, piès par piès, lé pa fini, mèt zarboutan tèrla, poto l’ot koté, klout la tol, boush lo trou, mèt také si la port. Nana travay pou fé ziska 2017, shakinn i dwa pran son par, prépar a nou déza pou par lo van é dévir d’lo, domin si siklonn i ariv pou vréman nou lé paré, tash manièr mèt tout an plass pou ging anparé, pou fé war nout gayar galman, é pi fé pa in kont èk sak i bour koko d’moun.


Kanalreunion.com