Oté

Asé mète l’otèr dsi bann viktime épi épargn bann koupab !

Justin / 10 octob 2012

Matant Zélida la ékrir Justin :

Mon shèr nové, mon spès salté,
Moin la antann in rouj-de-fon apré krétik La France, par raport bann komor bato la fé nofraj épi la noiye in bonpé d’moun. Moin, pèrsonèlman, mi konpran pa pou kosa sé La France ké lé vizé. Pars bann moun-la i sort Anjouan, zot la pran in bato komor, zot la pèy bann pasèr komor, épi gro mèr la trap azot koté Mayotte. Donk, mi oi pa kosa La France i vien fé la-dan. Akoz zot i rès pa shé zot, plito ké rode vnir Mayotte dann in mèr souvan dé foi lé mové. Arzout èk sa, kan zot i ariv Mayotte zot lé pa dann la légalité. Pou moin, zot la rodé, zot la gagné ! Tok, pran sa pou toué !

Justin la fé pou répons :

Mon vyé matant k’i koz touzour la boush rouvèr,
Sak ou i di i étone pa moin, pars na défoi, déssèrtin moun lé san kèr... Matant, la mèr koté Mayotte sé in vré simtyèr ! Konbien d’moun la tonm la-dan épi la gingn la mor ? Pèrsone i koné pa konbien o-zis. I koné pa si i fo kont par milyé sinploman, sansa par dizène milyé. I pass pa d’moi san k’in kwasa-kwasa i pran lo fon, sansa na d’moun i noiye avann gingn débarké.
Solon ou gouvèrnman La France na poin arien pou roprosh ali... Bien sir kisa solon ou l’otèr si la sityasion lé konmsa ? Inn, si Mayotte lé séparé avèk lo rèss bannzil komor. Dé, kisa l’otèr si bann zil komor té lésé dann sou-dévlopman ? Troi : kisa ankor la fote si l’indépandans té mal préparé ? Kat : Kisa, aprésa la fé viza Balladur pou anpèsh bann moun komor voiyaj in pé libroman. Sink : Kisa i aplodi kan i ranvoy bann moun l’androi zot lé né par sharjman. Sis:kisa i domann bann militèr fé lo shif.
Matant, moin lé sir na poin arienk inn-dé moun i pans konm ou, mé moin non. Pars, pou moin, dann in bann drame konmsa, i fo pa mète l’otèr dsi bann viktim é obli lo bann koupab. Tok ! Pran sa pou ou ! Ou moin !

 Justin 


Kanalreunion.com