Oté

Astèr la pi bozwin 8 mars !

Justin / 8 mars 2016

Zordi néna trant-név an l’ONU la désid pran lo 8 mars pou fé la zourné d’la fanm. Sé in zourné éspésyal pou banna, pou pran an kont zot difikilté, pou rann a zot homaz. L’ONU la désid in zour éksopré pou banna, sirman pa pou la po patat. Dopi 1977, trant-név an, éské ozordi ni pé di lo maléré sor banna la anbéli, la v’ni plis mié ousinonsa lé v’ni pli pir ? Sanm pou mwin a lalir ki sava i fo ankor kèk 8 mars pouk pou vréman bann madam i gingn tout zot plass.

Déza na pwin tank sa d’tan banna na lo droit voté, dopi 1944, dopi lo tann banna i kour déryèr késtyon légalité èk bononm ? Lé rokoni, pou minm travay, pou minm résponsabilité in madam i gingn pa lo minm salèr kin bononm. Dann gran lantropriz lé rar war in madam pran la tèt an o. Dayèr, pa solman shé bann ti kolon néna lanyaz. Avantyèr o swar, mwin la antandi inn miniss souplingn a èl pou di konm sa laba lasanblé bann dépité i fé lo kok.

Aprésa néna la violanss banna i sibi. Tousala lé insiportab. I éspass pa in zour ni antan in madam la gingn lo kou son kaz, ziska gingn la mor dé-fwa, in ot la sibi lo viol dann shomin, ousinon in ot lé arsélé dann travay. Minm si zordi néna la lwa pou kad in pé tousala, malérozman ni pé pa di banna lé an sékirité pou vréman. Ni krwaz lo dwa pouk byinto l’ONU i di konmsa “Astèr la pi bozwin 8 mars“. Mé kansa na di sa ?


Kanalreunion.com