Oté

Atann pa i shavir sansidsou !

Justin / 12 séptanm 2015

Konm koué nout péi la Rényon lé pou vréman anmayé. Nou sré pa malad kansréti ? Pétèt nou na fort tansyon, pétèt nou na batman d’flan, pétèt in maladi pa rokoni, mé nou néna sirman in nafèr pou ké, zis inn ti ralé pousé marmay in pé an brinnzing, ala toudinkou ni rotrouv a nou an sharèt shaviré, an ki si tèt. Zis inn ti simagri marmay sin pir la o ron pwin bas-tèr yèr pou arèt tout. Inn ti néstan, té pé pi avans ni dovan, ni déryèr.

Dann radio i di konm sa, banna i rovandik in lanplwa. La i di, pou rézon lo mèr la promèt a zot in lanplwa dann zéléksyon é konm zordi ankor na pwin ryin, lo tan larivé pou bouz in pé. Banna lé pa gourman, i domann pa la linn zis inn ti zanplwa édé i di. Si lo mèr la promèt pou vréman pou èt éli zordi fo fé. Sanm pou mwin, pou bann mèr i dovyin plizanpli difisil, léta i donn pi dotasyon, pou lo sid, la civis i raz la pint é kont pi si zinpo, domoun lé ragoulé.

Minm si lo mèr na bon volonté, minm si li donn inn dé zanplwa édé konm si konm sa li nyaboura pa donn travay tout, néna 170000 moun i atann. Si ni sanz pa sistinm, si ni kontinié èk nout vilin manièr, konm ni di tou lo tan, ni sava drwat dan lo mir, nou lé déza dan lo mir. Rozman tanzantan bann marmay i rapèl a nou nout dovwar. Zot i domann pa la sharité, Zot i domann travay. Atann pa i shavir sansidsou !


Kanalreunion.com