Oté

Avan ranpli lo panié, argard si i koul pa atèr !

Justin / 23 zanvié 2016

Zot i koné kosa i vé dir sharoy dolo èk in panié pérsé ? Ou mèt dolo dann panié é konm lo panié lé pérsé firamézir i mèt dolo firamézir dolo i koul a tér é boudikont zamé lo panié i ranpli. Ti marmay nou té i sharoy dolo pa èk in panié, nou té i sharoy èk in fér blan mé final do kont té paréy. Konm lo kanal dolo té i tonm in pé lwin par rapor la kaz, nou té i ranpli lo fér blan borabor, é pou anpèsh floté nou té i mèt in pé la pay kann dann fér blan.

Malgré sa dolo té i flot kan minm é té i débord ziska pi an awar défwa minm pa inn ti gingn pou mouy la gorz ziska la kaz. Donkalor o plis nou té i sharoy, o plis navé pwin d’lo, dolo té par shikèt. Sanm pou mwin zordi, mwin na konm linprésyon si la késtyon somaz lo gouvérnman la dopté lo systinm panié pérsé ou sinonsa férblan dolo. A koz ? Zordi la lans lo plan “d’irzans sosyal“ in plan pou form bann moun inskri pol anplwa.

Néna i di déza, sé in manièr pou fé bèss lo nonm moun i rod travay, pou fé bèss lo nonm lo tan ziska zéléksyon, néna i prétan sa. I konsèrn apopré 500 000 moun. Minm tan ni antan bann lantropriz i kash pa pou di domin i riskab néna in takon lisansiman, minm bann lantropriz léta. Vi la tournir dé zévénman, sépousa mi di pou trèt pou vréman la késtyon somaz, odrémié avan ésèy ranpli lo panié, pétèt argard si i koul pa a tèr !


Kanalreunion.com