Oté

Avèk in pèyman konmsa, i gingn ashté in fès-an-or

Justin / 1 désanm 2009

Na dé-troi zour, promyé minis gouvèrnman fransé la fé in tourné avèk lo pédézé l’EDF. Kossa zot l’avé parti fé ? Mi ansouvyin pa. Pars moin la pa byin agard dann télé ? Mèm pa ! La pa, pars souvan-défoi, la télé i donn aou l’informasyon ou la pa bézoin... Sak ou la bézoin, lé rar ou i antann. Non, mèm pa pou sa ! Mi rapèl pi kossa lé dé zène-zan kranèr la parti fèr pars nana in l’informasyon la kapar mon l’éspri, épi moin lété pi disponib pou ékoute lo rèst. Sa lé konm sa... Donk, ala lo l’informasyon, promyé minis la fané : i paré, méssyé Proglio, pédézé, nana problèm nivo d’vi, vi k’in pé i rode diminyé son pèyman. Byin sir, promyé minis k’i défann z’intéré bann ti travayèr la di : « Sa la pa in n’afèr pou fé ! Lé normal k’i diminyé pa son pèyman. Li doi an avoir mèm kantité larzan ». Bravo ! Mon kamarade Bébé la di li lé kontan an avoir in promyé minis i pran la défans bann travayèr... Solman, kan li la aprann konbyin lo boug té i gingn, li l’arète bète. Li té i kroi pa in n’afèr konmsa té possib... pars lo boug té i gingn in milyon, sisan mil éro dan l’ané... donk plis san trant mil éro dan lo moi... donkalor, son pèy i roprézant plis sak san travayèr o-SMIC i gingn.
Oté ! koman li lé bon don, pou gingn in pèyman konmsa ? Kèl kalité, kèl kantité travay li fé pou an avoir in gro moné konmsa ? Moin pèrsonèl, in n’afèr konmsa mi konpran pa...Touléka, avèk sa, li na moyin fé konm Grandyab, dann zistoir Tizan, ashté pou li in fès-an-or... Fransh vérité !

Justin


Kanalreunion.com