Oté

Avèk lo risk, in zour, tousa i fini an katédral kasé !

Justin / 8 désanm 2011

Matant Zélida la ékrir Justin :
Mon shèr nové, mon spès salté,
Mi éspèr ou nana kashé pou mal dé tèt out kaz ! Pars sa in n’afèr bien nésésèr sirtou si ou la gingn in gro kontrayété, avèk dann trin in gro mal dé tèt. Mi san ou lé a’dmandé pou kosa mi di aou sa. Ou lé a’dmandé pou kosa matant i sousyé in pé la santé son monstré d’nové, rouj-de-fon, konm i dovré èt défandi.
Mi sava dir aou konmsa, zot l’avé bo anons bann gran projé mésyé Didier i sava avorté, zordi zot i oi zot l’avé tor é mésyé Didier l’avé rézon. La prèv : Li sort gingn in gro shèk avèk la kès Dépo épi konsignasyon, in shèk sink san milyon siouplé pou komansé. Mi éspèr bann rouj-de-fon i rann azot kont zot lété dan zot tor. Zot l’apré rann azot kont, zot ane, sé in bourik. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, Moin lé bien èz oir aou kontan konmsa. Konm di lo kont : sak i ri vandrodi, dimansh i plèr ; Pèrsone i koné pa si lé fézab ! Pèrsone i koné pa o-zis konbien sa i sar kouté ! Boudikont, pèrsone i koné pa si lo gouvèrnmann razèr d’pint va réspèk son parol pou vréman.
Lété tro fasil, épi té tro komod suiv bann projé Paul Vergès ; tout té mashé, té i arèst arien k’pou anvalé. Mé té i falé dévir lo do èk sa. Avèk lo risk tousa, in zour, i fini an katédral kasé.

 Justin 


Kanalreunion.com