Oté

Ban Ki moon dann l’oséan indien in pti galé i pé anpèsh in kap tonbé !

Justin / 17 mé 2016

Mi pans, lo moun i lir zournal Témoignages, i koné, somenn dèrnyèr mésyé Ban ki Moun la fé in voiyaz dann nout réjyon l’oséan indien. An parmi bann péi li la vizit azot, li la vni L’il Moris, li la vni galman Madégaskar épi d’ot ankor pars son voyaz lété pa ankor fini l’èr moin la fé mon modékri.

Kisa i lé mésyé Ban Ki moon ? Mésyé-la I tonm sogrétèr zénéral lo l’organizasyon bann nasyon z’ini (ONU). Sa in l’asosyasyon ofisyèl. Son syèz lé la-ba dann New-York é nana san katro-vin trèz péi nana in délégasyon la-ba. Donk sé in moun inportan é li lé okipé pou sèy règ bannkantité problem la list sré tro long pou fé - konm demoun mon kartyé Boi d’nèf té I di : sa in om dé valèr !

Donk l la vni pou fé in vizit ofisyèl dann l’il Moris. Li la pass dann télé épi li la félisit nout voizine pou son rol pou vanj kont lo réshofman klimatik. Par l’fète, zot i kone Moris lé an parmi bann promyé péi la sign lo z’akor d’Paris. Bravo nout voizine ! Mi apèrsoi z’ot zyé lé rouvèr é pa konm in pé isi La Rényon é mèm dan La frans.

In romark solman : mésyé Ban Ki moon la pa vni La Rényon. Mi pans gouvèrnman La Frans, konm d’abitid, i mazine nou sé in zéro la gosh in shif késtyonn rolasion rant nasyon mé si li l’avé invit lo sogrétèr zénéral bann nasyon z’ini isi la Rényon, pétète li n’ora fé in tour . Pars konm lo kozman i di : « in pti galé sé arien o pré d’in kap, mé li pé anpèsh in kap tonbé ! »

Mé pétète lo gouvèrnman i s’anfoutsa osinonsa li oi pa pli loin ké son bout né .

Nb. A moins ké gouvèrnman l’avé pèr fé romark ali an o lyé son politik kolonyal.


Kanalreunion.com