Oté

Bankal dann bor kanal !

Justin / 28 out 2009

Sirandane ? kanpèk ! Kossa in shoz ? Bankal dann bor kanal ! Mi pans zot i koné kossa i lé, sansa z’ot léspri i doi z’ète apré travay pou trouv lo tik-tak, pou trouv kossa i lé. Konm moin, mi sipoz, zot i èm nout kiltir popilèr : sa sé in pti manzé pou léspri, manzé pou lo kèr, nout kèr k’i bate ansanm-avèk sète nout péi. Nout kèr dé foi dan la guété, dé foi dan la tristèss.
Mé akoz, zordi, mi pans sirandane-la ? L’avé tan-é-tan d’ote pou maziné, mé akoz sète-la ? Akoz zordi ? Pétète, mèm sirman, pars mi sort antann dann radyo KOI, lindi va fé in l’émissyon éspésyal déssi bann « asistan-l’édikasyon ». Pars sé z’ot dèrnyé zour travay : gouvèrnman la anvoy azot fèr-foute, la di azot la pa bézoin d’zot. La pa bézoin z’ot kapasité, z’ot léspéryans, tout-sak zot la done bann marmay, bann paran, épi lo kou d’min, l’ède, zot la aporte lo mètr, la mètrèss, lo diréktèr, la diréktris. Boudikont, pou kossa zot la fé sa pandan sizan, sète-an, ziska dizan, mèm plis.
Madam la ministrès l’avé byin di : "I lèss ar pa pèrsone dsi l’bor shomin !". La Frans, sa lé grann la Frans, sa lé zénérèz la Frans, sa na bon kèr la Frans, sa lé solidèr, é son gouvèrnman i réspèk son bann valèr. I prétan dir, na poin aryin k’i rosanm plis la vérité ké lo figuir d’in bon mantèr… é, i pé dir zot la vi kék figuir d’mantèr. Moin lé sir zot i ariv mèm pi konté.
L’amènn azot an sharète shaviré, l’amènn azot o-boute la mor z’ot prop métyé. Zot lé pi dsi bor shemin ! Zot lé karéman, dann bor kanal, dann fon kanal : bankal dann bor kanal... gronouy dann fon la kivète shomin la tèr.

Justin

Léplikasyon inn-dé pti mo :

Bankal dann bor kanal : gronouy.
Sirandane : sa in dévinète sa.
Kanpèk : sa i vé dir daor pou zoué dovinète.
Amènn an sharète shaviré : amènn an bob, an kouyon, an koulou.
Kanal : la kivète té i borde bann shemin la tèr.
In pti manzé pou lo kèr : sa i akonpagn l’évanzil an kréol, déssi radyo arkansyèl.


Kanalreunion.com