Oté

Bann goloi la pa nout papa, zéro kalbas la fimé gran-boi

Justin / 30 séptanm 2016

Na dé-troi zour in dalon la rakont amoin in zistoir. L’istoir in ga lé déza papa kat z’anfan épi li di shak nouvo z’anfan lé pli klèr ké lé éné avan : la komans par inn lété vréman fonsé, épi l’ariv in n’ot té pli klèr, épi in n’ot ankor pli-pli klèr, ziska lo dèrnyé té pa loin trap la koulèr blan, konm i di isi La Rényon. L’èr-la, lo moun i ri é son famiy i ri avèk li. Pou kosa d’apré zot ? Pars li la di, si na in proshin lé riskab li sé in blan-blan. Sa i vé dir in moun ou i oi lé métisé par son shové, par son bann tré mé la po lé blan, défoi mèm pli blan ké sak lo blan.

Pou kosa mi rakont sa ? Dabor pars mi trouv sa lé rigolo par la manyèr mon dalon la rakont amoin zistoir-la, épi par la manyèr demoun shé nou-pa toute, mé in bon pé !-na poinn konplèks koméla par raport la koulèr la po. Sa sé in n’afèr k’i bote amoin. Zot i koné dann tan, lété mal vi in maryaz rant dé pèrsone la pa mèm koulèr. Moin na in kamarad zistoman in blan-blan, é bin son famiy la fash avèk li pars li la maryé avèk in moun zot té i apèl in moush noir-blé. Anfin mi pans sa lé in pé déyèr nou é sé in kontantman pou moin !

Ala pou kosa, kan mi antann in moun, mèm si li l’été prézidan La Répiblik, apré parl nout z’ansète sé bann goloi. Pli pir, li di k’in foi ou la gingn la nasyonalité fransé bann goloi sé out z’ansète galman. Ayayay ! Kan mi koné final de kont tout nout z’ansète na par-la san mil z’ané lété noir é té i sort l’afrik pou alé partou dsi la tèr. Kan mi koné na arienk uit mil z’ané bann z’éropéin lé « blan » moin la anvi dir in pé si zot na poin arien pou dir, zot i pé fèrm z’ot také, pars fèrm son také la pa in péshé kapital.

Pou finir mi invite tout demoun pou ékout la shanson jacqueline Farreyrol ou sa èl i di : « Bann goloi la pa nout papa, zéro kalbas la fimé gran-boi. »-in bien gayar shanté an vérité.

*Blan-blan an kréol sé in albinos.I di osi toublan, la blansh, épi na d’ot nom ankor. Moin la lir sa dann liv Daniel Honoré « Semi-lo-mo »


Kanalreunion.com