Oté

Bann kandida nout parti i vé shanj de baz !
Sak i vé sa anparmi lé zot lé rar konm korn lapin !

Justin / 2 juin 2012

Zot i koné la diférans rant in linj nèv épi in linj rakomodé ? Bien sir ! Mèm in marmay i pé amontr aou sa. Kan lé nèv, lé nèv ! Kan lé rakomodé, lé rakomodé… mi vé pa di, i fo pa mète in linj rakomodé pars si lé bien fé, si lé près pa vizib, nana in posibilité pou ralonj la vi out linj. Sa sé pou linj ! Dakor. Mé pou la sosyété, pou l’ékonomi, pou l’anvironman, pou la kiltir, sa lé pa touzour posib. Rakomodé, sé éfas bann ti défo, boush bann ti trou, mète in pti pyès. Sa lé pa posib pou in l’ékonomi mal dévlopé, sansa pa dévlopé ditou. Sa lé pa posib pou in sosyété mal ékilibré, èk l’inégalité partou, avèk la mizèr noir par in bout é lo tro d’rishès par l’ot bout. Sa lé pa posib pou in l’anvironman gaspiyé, anfarlangé. Dan l’intèrnasyonal i di, lo mond i doi shanj de baz, pars son baz lé fo konplètman ;
Alon arvir in pé dsi la politik. Zot i koné, isi nana soisann-dis pèrsone i vé gingn la plas dépité. Mon késtyon ? konbien anparmi i vé solman rakomod l’ékonomi, lo sosyal, l’anvironman, la kiltir ? Sir, nana in bon pé. Final de kont, in bann i vé pa shanj sak lo kolonyalism épi l’apré kolonyalism la lès pou nou. Zot i konpran, sa sé in n’afèr i pé pa marshé, vi k’sé in rakomodaz é pa in shanjmann baz ; Pou shanj de baz, i fo dévlop lo péi, armète anlèr la libèrté épi l’égalité, épizapré bien rofé l’anvironman épi bien dévlop la kiltir... Sak mi romark, sé ké rakomodèr i mank pa, mé sak i vé shanj de baz, sète-la na poin bokou. Sanm pou moin, bann kandida nout parti i vé sa. Anparmi lé zot, sak i vé sa lé rar konm korn lapin !

Justin


Kanalreunion.com