Oté

Bann kasèr, sa i an mank pa La Rénion !

Justin / 26 avril 2013

Mi kroi kan mèm, in zour, désèrtin, i fodra zot i rann kont lo mal zot la fé lo pèp rénioné. Kisa an partikilié ? Tout bann kasèr dopi l’ané 2008. Kisa i lé sa ? Sak la dévir lo do èk lo l’ipodrome Sin-Pol, sak la bat atèr lo prozé éco-vil lo mèr Bénard té fine bien fé avansé. Ni koné ki i lé, la pa bézoin mark lo nom. Kisa ankor ? Sak la ronons in krédi dé-san milion l’éro té prévi pou lo kontournman la vil Tampon. Ni koné kisa i lé ! Sak la ronons lo Zénit, sak la mèt in poin final pou l’éspas oséan, pou ardékouv lo prozé zordi. Sak la tié kou dsi kou la MCUR, lo tram-trin, l’otonomi dan l’énèrji, lo plan TIC, la rout litoral kat voi. Tout sak la arèt bann bon projé bien solid pou, konm di bann Fransé, ranplas ali lo miroir z’alouèt.

Kosa i lé sa ? Lo sisan mil touris, lo dé mil bis, lo kat mil shofèr lo kar, la rout dsi la mèr. Tout so bann projé zordi nana lo plon dan la zèl, é firamézir, bann shif i aparèt i amontr koman zot la éshoué... In l’égzanp ? Bann touris. Lété prévi sisan mil l’ané 2014. L’èr ki lé, nana zis kat san trant mil é lé pa pré d’ariv o bi, lo bi zot la done azot par zot mèm. Mi sort antann dann télé, La Rénion lé déyèr Moris, déyèr Sésèl galman, é si i kontinié, na d’ot péi nout réjion lé riskab trap anou, é mèm koup dovan.

Sa i étone azot sa ? Moin non, pars batir lé difisil, kasé, sa lé fasil, é bann kasèr, sa i mank pa La Rénion.

NB : I paré désèrtin l’apré fé in plan shifré pou dévlop La Rénion, mé pou l’instan, zot na in parti, mé zot la poin program. Lé vré, gro poison i bèk dsi l’tar, mé dé foi, li bèk pa ditou. Lé a suiv !

Justin


Kanalreunion.com