Oté

Bann l’éspri kourt la fine pran pouvoir !

Justin / 13 octob 2011

Zot i koné Louvois ? Sa té in sort minis la guèr kan Louis 14 té i tonm roi la Frans. Dann tan-la, pou gingn in komannman dann l’armé, té i falé ou nana san blé dann vène. Na dé foi, lo boug té i gingn in n’afèr konmsa té i sousyé pa si lo l’armé lété paré pou fé la guèr, si lété bien roganizé, épi pèrsone té i di pa tro granshoz mèm si lo komandan té plis okipé pou fé la fète dann palé Vèrsay, olèrk okip son sharj konm k’i fo. Donk in zour, Louvois la bosh in san-blé é la domann ali dann kèl l’éta lété son troup. Boug-la la réponn, li koné pa, mé li va done l’ord. Lo minis la fé pou répons : ou nora déza di fine fèr.

Pou kosa mi di sa ? Pars moin la vi dann télé, la ministrèz l’ékoloji la pa kass la tète pou réponn madam Bélo dési la késtyonn rokin. El l’avé, fransh vérité, poin granshoz pou dir, vi k’son kozman té kourt. Sirtou, lo bann fraz lété o fitir. Va fé si ! Va fé la ! Donk la pankor fé arien, si mi tronp pa. Noré té bon l’avé in Louvois pou drèss in pé sé kot... na poin demoun konmsa dann gouvèrman la Frans. Lo boug nora di ali, plito ké koz konmsa, nora di an avoir komans fèr.

Mé mèm si son kozman té kourt, par l’fète, an ké d’ra, la pa anpèsh ali di in n’afèr romarkab. El la di, z’afèr rokin lé inportan pou bann Rényoné, mé sirman plis pou bann touris, pars sa in séktèr l’ékonomi lé inportan. Asplik amoin in pé ! Lé pa tro inportan pou bann Rényoné ? Si i kronm inn tazantan, i fé arien alor ? Sé bann touris i fo pa k’i toush ! Kèl minis l’ékolozi nou nana ? Sanm pou moin, li sousyé pa la biodivèrsité, li kass pa la tète pou bann zéspès. L’om rényoné sé lo dèrnyé rou son sharète. Li parl l’ékonomi, san tro bien konprann sak li di.
Oté la Frans, révèy aou in pé ! Bann l’éspri kourt la fine pran pouvoir !

Justin


Kanalreunion.com