Oté

Bann marmaye pov, va oir sa inn proshène foi !… dann 185 z’ané !

Justin / 1er septembre 2016

Zédi promyé séptanm, la line i sava pass rant solèy épi la tèr. Donk i sa fé in l’éklipse. Pandan in bout tan solèy va prozète dsi la tèr, l’onbraj la line donk la klarté va diminyé. Konm la line lé pa tro gran par raport la tèr n’ora in z’ano va rès kléré : sé pou sa i apèl sa in l’éklips anilèr. La Rényon sar dsi in lign i pass par Madagaskar épi lo sid l’afrik. Donk sa sé in n’afèr i oira pa partou : mèm tèr-la l’il Maurice i oira pa. I oira pa sa non pli dann tout Madagascar. Ni pé dir so kou isi nou lé vèrni pars na dé foi ni oi pa arien.

Konm sa i ariv pa tou lé zour, i sava fé in gran sinéma otour d’lo z’afèr. Mèm bann touris va vni oir sa, san konté bann savan épi lo bann z’amatèr sak i éspas dann syèl épi dann z’étoil. L’ékol va mélé galman pou inn foi ké li nana dé shoz intérésan pou amontr bann marmay. Moin la tandi dir bann mètr épi bann métrès la prépar z’ot zélèv pou bien anprofite so z’afèr-la : shakinn nora son linète pou pa gate son zyé, shakinn va oir lo fénomène an vré épi va oir osi dann télé. Lé vayan in n’afèr konmsa !

Lé vayan ? Oui mé na kant mèm plizyèr l’ékol va fèrmé pars la méri konm bann z’amontrèr i vé pa pran la résponsabilité si in dézagréman i ariv bann marmaye é sé pou sa isi i di na poin rido, la i di napoin nénène an kantité k’i fo, bann paran i komans difizé dsi Freedom. Donk in bonpé marmaye i oira pa in n’afèr konmsa avèk lo komantèr in moun k’i konpran lé shoz, mé bann priviléjyé v’alé rogard sa la-ba l’étan-salé avèk bann savan l’obsèrvatoir Les Makes.

Anfin, si in bonpé marmaye pov i oi pa so foi isi zot va oir proshène foi. Proshène foi ? Bin oui, dann 185 z’ané nora in nouvo l’éklips anilèr ! Marmaye koméla, malorèzman, sar fine ariv an pousyèr dan la pousyèr.


Kanalreunion.com