Oté

Bann ponpyé piromane ! Bann foutèr d’fé !

Justin / 23 mars 2012

Sak i suiv in pé lo pri pétrol i apèrsoi lo pri la goumanté. I apèrsoi galman oplis lo pri i goumant, oplis bann konpagni i fé bénéfis. Konm gouvèrnman i vé pa toush kansréti in pti pé bénéfis bann pétrolyé, é bin lo pri détay lé kondané pou vni pli shèr an pli shèr. L’èr-la, in pé i fé travay lo pti grin matyèr griz nana dan zot tèt pou sèy trouv in parad. Mé lé vré, zot na poin granshoz dan la tèt, sof pou gingn roul anou dan la farine.
Kan la Réjyon la lans son plan l’otonomi dan l’énèrji, in pé la fé tout pou kas plan-la. Pou kèl rézon zot i kroi ? Pars sirprofi bann pétrolyé té dann danzé. Mé banna la pa pétrolyé par zot mèm, kisoi lo préfé, kisoi bann transportèr, kisoi bann moun l’UMP mèm... Bin akoz zot i fé sa ? Pars, konm lo zo i soutien la shèr, dan so trin-la nana in gran solidarité, rant bann kopin é bann kokin, é nou pti kolon rényoné ni rès atèr.
De boush, zot lé pou l’otonomi dan lénèrji, mé pou de vré, i sifi oir zot bann désizyon pou konprann zot lé pa pou sa, touléka zot i ranvoy sa dann kalann grèk. Dizon l’énèrji solèr lé an pane, l’énèrji jéotèrmik i avans pa, l’énèrji la mèr la gingn in kou d’zok. Lo ray, kisoi tram-trin, kisoi lo trin, kan partou sa i avans, isi lé fine arété. Poitan, si ni vé, lo trin sa i pas partou sa. Sa i fé pa l’anboutéyaz dsi la rout. Sa i gaspiy pa l’énèrzi pou transport demoun, ni pou transport marshandiz.
La promèt Kréol l’ésans va bésé ziska moi d’désanm, mé kisa va pèy sa ? L’oktroi d’mèr, mé sa i sort dan nout posh épi sa i ansèrv anou. Gouvèrnman i fé zorèy koshon dann marmit poi ! Son bann valé sir plas i rod tir l’arzan dsi nou, pou èd pèy nout gaz, pou èd pèy nout l’ésans. Mé ziskakan ? Promyé avril, promyé alèrt, é apré ? Pétrol brit va bésé ? Priyèr bondyé, mé fyé pa tro. Boudikont, nana isi in bann ponpyé-piromane, in bann foutèr d’fé.

Justin


Kanalreunion.com