Oté

Bann projé pou La Rényon Akoz i agard pa lo projé plito k’la tète !

Justin / 30 séptanm 2010

Monte in projé, sa i mète lo tan. Amène ali zisko boute lé long ossi. Nout toute i koné sa, vi k’nout toute la vi sa dovan nou. Konbyin lo tan la mète pou fé la route tamarin ? Konbyin la mète pou boulvar sid ? Byin sir, demoun na poin pasyans é zot lé pli présé k’présé. Mé, ni vé, ni vé pa, sa i mète lo tan. Lé konmsa é pa otroman !

Bann zazèr i zaz !
In projé lansé avèk la boush nana tout-suit son partizan é son kont-partizan. Demoun i diviz an dé : sak lé pou li épi sak lé konte li. Shakinn nana son prop projé. In pé, dann zot tète, i dovyin téknisyin, d’ote i pran azot pou l’inzényèr, nana in kantité éspésyalis dann toute lé éspésyalité. Bann manipilèr i manipil. Bann zazèr dann radyo pèrkal i zaz. La lang i bate : “Gasparin-Brunet, Brunet-Gasparin” !

Si l’avé suiv bann program lo PCR
An parmi sak nana lo plis z’idé nana nout parti, lo PCR. Dann toute bann plan li la fé, nana bon-bon z’idé. Na z’idé pou shanj la sosyété, pou dévlop lo péi, pou amélyor tèl shoz, pou ranplas in n’ote par inn lé pli myé. Mé konm sé li, i fo tonm déssi. Lo rézilta zordi, vintéinyème syèk nou la pankor trap noute dévlopman.
Alor ? Alor ! Plito k’rogarde la tète sak i propoz, démyé, rogarde lo projé pou li-mèm ?

Justin


Kanalreunion.com