Oté

Bann zanimatèr zémisyon télé i oryant lo déba ?!

Justin / 11 octobre 2013

Oté ! yèr swar navé in déba télévizé si Rényon 1èr èk Colliene, inn animatris, son non i revyin pa dan mon tèt an so moman, lo zournalis ki pik konm in zépine (Montrouge), konm politik, ou navé Vira, Victoria é Vlody.

Zot i parl zot sondaz si dé-troi vil si lo mèr s’ra rééli, si la popilasyon i souèt li s’ra ankor mèr é su son géstyon dépi 4-5 an li lé la.

Yèr la parl Sin-Zozèf, Sin-Lui, Lo Por, Sint-André, Sin-Dni, Tampon.

Dabor inn, lo zournalis i pik knom in zépine la ginye in zok èk Victoria ; Victoria i di a li, kan i parl divisyon la gos, li ékout èk atansyon, kan i parl a li rekonstriksyon la droit, li fout a sourir, konm si li lé pa dakor, li an fou é li fé konprann zamé zot va arivé. Bon, lo zournalis la rantr dann ran.

Non, la pa sa mi vé parlé.

In moman, i ariv si Sint-André. Konm Vira té la, normalman noré di kozé. Erik Fruteau i ginye pa prézant a li zéléksyon lané prosèn pars li lé inélizib po zistwar dépi 2008. Nou la antandi son 1ér adzoin i prézant, mé poukoué lanimatris i di, Joé Bédié va alé si MPLR d’Hugette Bello ? Ki i di a èl Bédié va alé èk lo nouvo parti la kréé si Sin-Pol ?

Mi trouv lanimatris i dépas son rol. Poukoué èl i di pa, sa s’pé osi li sar si son famiy tradisyonèl, lo Parti kominis réyoné. Si èl i koné pa sak i spas si la vil de l’èst, lès alor Vira di a èl rès dan son fonksyon, anime lo déba, done pa loryantasyon !

Lo téléspéktatèr ki antan sa i di : sayé, manzé lé déza kui Sint-André, vyin diné !

Bann zanimatèr zémisyon télé i doi pa oryant lo déba !

Justin


Kanalreunion.com