Oté

Banna i mérite pa in n’afèr konmsa !

Justin / 18 out 2010

Matante Zélida la ékrir Justin :
Mon shèr nové, mo spès salté, mi sipoz konm moin ou la rogarde in pé zaktyalité. Ou la vi lo parti lo prézidan i vé pi pèy la rantré éskolèr an larzan. Li vé donn in bon pou bann paran ashté zis sak i fo pou bann marmay lékol. Lété tan... lété plis ké tan k’in pé i konpran so larzan-la té i ansèrv pa pou bann marmay vréman. In pé té i ashète télé, pran tèl bouké nimérik, pran linj la mark. San konté sak té i fé la fète la-dan vèy pa koman. Ala in n’afèr bann rouj-de-fon nora pa maziné. Tok ! Pran sa pou toi.

Justin la fé pou répons :
Mon vyé matant k’i koz touzour la boush rouvèr, mi pé dir aou pa plis bann rouj-de-fon, ké lé zot moun, nora pi mazine in n’afèr konmsa. Pou kossa ? Pars sé artourn an aryèr, dann tan té i pran la moityé larzan zanfan pou pèy la kantine, sansa pou lékol miitèr Tampon. Na poin méyèr manyèr pou abèss bann famiy ké fé in n’afèr konmsa. Par l’fète pou abèss bann famiy pov épi sak la poin lo pourkoi konm k’i fo pou anvoy zot zanfan lékol. Mi pé dir aou, banna i mérite pa in n’afèr konmsa.

Justin


Kanalreunion.com