Oté

Bat karé Adélaïde :

Justin / 17 novanm 2010

"Tro d’pintir i rolash !"

Matante Zélida la ékrir Justin
Mon shèr nové, mon spès salté,
Mi ékri avou dépi Adélaïde, dann l’Australie. Méssyé Didier la fé pèye mon voiyaj par Konsèy réjyonal. Pou kossa moin lé la ? Ou na vrémann toupé ! Pars moin lé vièy, moin na poin lo droi d’bate karé ? I pé dir k’moin la voiyaj in bon kou. Tout fasson, méssyé Didier la di, toultan k’va rèss in katsou déssi larjan la ramass pou la MCUR, li va fèr bate karé d’moun, é li ossi sar la pou l’anprofitasyon. An parmi l’moun, li va fé voiyaz sirtou sak i partaj son l’opinyon, pars lé z’ot : "Deboute, guète !". Tok ! Pran sa pou toi !

Justin la fé pou répons
Mon vyé matant k’i koz toujour la boush rouvèr,
Mi konpran pou kossa vou lé la-ba, vou lé si tèlman inn bone kuizinyèz ! Vi gingn fé bon kari : baba fig, brède manyok, kari d’bishik é lo rèst. Sé sirman pou sa ké la invite aou. Pou fèr inn bone kuizine é fèr vnir bann z’australien La Rényon. Mé kossa i anparl dann zournal so zistoir d’vo maringo ? La parti fèr la kuizine la mèretropol don la-ba ? Banna la onte anou don ?

Moin la tandi dir la pa solman onte, la suif anou in pé dann in pti zournal 740.000 pèrsone i ashté. Mèm ké lo prézidan la-ba la di kont pa dsi li pou vnir La Rényon. Kont pa dsi li pou donn in katsou. Apré l’azoute ankor la pa tonm an antant avèk nout délégasyon. La pa sign z’akor ! I fo dir in pé la tro sharj delo, la rakont tro la mansonjri. Konm di lo kont : "Tro d’pintir i rolash !"

Justin


Kanalreunion.com