Oté

Batay pa pou la po graton ! Pandann tan-la, kabri i manz salad !

Justin / 6 zwiyé 2015

Mi koné pa si zot la suiv lo zé d’ponp rant mésyé Didier Robert épi madam Pau Langevin. Inn i vé fé port l’otèr dsi l’ot é l’ot i vé fé port l’otèr dsi lo promyé. Kosa sa i vé dir ? Sa sé in késtyonn mobilité pou bann jenn. Kisoi sak i vé fé zétid dan La frans, kisoi sak i vé alé fèr in éstaz pou gingn in métyé. Figir azot l’èr k’i lé, bann jenn i rès dann fon kanal.

Pou kosa ? Moin pèrsonèl moin la antann listoir in jenn fiy La Rényon. In gran klèb dan La frans i trouv èl i zoué bien balon fotbal. Donk la fé inskri aèl dann in klas éspor étid la-ba dann La Frans. Mé i fo alé la-ba, épi i fo viv osi -goni vid i tienbo pa d’bout !- é lo bann paran na poin bonpé l’arzan pli k’i an fo. La Réjyon i di, alé domann gouvèrnman. Gouvèrnman i di : domann la réjyon. Inn konm l’ot i di zot la poin in lign bidzétèr pou mark lo nom dsi.

Pou kosa so ralé pousé ? Gouvèrnman i di la Réjyon i préfèr roganiz bann voyaz l’agréman é li sousyé pa lo voiyaz pou trouv in l’avnir é sa lé vré. La Réjyon i réponn : sé l’éta ki vé pa péyé zordi, alé oir sa lété dann son réyon ziska isi. Sa lé vré galman. Solman, dann tout so falbala, nana in jenn fiy avèk son famiy lé pri an otaz. Kisa i di ké jenn-fiy la, va artrouv inn shans konm sèt-la, si èl lé blijé lès filé. Mi pans pa ké nout zénès i méri in n’afèr kom sa.

Sa in batay i vo la pène sa ? Non konm di lo kont i batay pa pou la po graton é pandan éstan la, kabri i manz salad.


Kanalreunion.com