Oté

Batayi arm égal ! Koué larivé ?

Témoignages.re / 8 févrié 2014

Na biin lontan, dan in diskisyon, in moun la po kozé si in sitiasyon ou sa ou na dé adversèr ; i pé èt in patron ék son bann zouvrié. In pouvoir kelkonk fas zadministré. Dan in déba ék dé fors an prézans. In lit po ansort a ou dann difikilté, ou sak an fas, lobstak sé inn persone konm ou… lo moun té in fanm kréol mé èl té profésèr d fransé ! El té i di souvan : « pran lo minm zarm ke ladversèr… oua giny débat ék li pou fé antann out zargiman si ou lé a armégal ! »

Moin té i konpran pa tro sak él té i vé dir.
Moin lapré lir listwar bann zindiin Guatemala, Amérik santral. Zindiin lé la dépi plizir milié dané ; zéspaniol i ariv, koman i di « conquistadores ? » lépok Kristof Kolon. Bann kolonizatèr la, la tié, la volé, la violé, la spolié lo bann zindizèn, la pri zot térin, la di a zot artourn dan la montagn, arkomans défrisé po viv ! »
Pandan so tan, bann blan la, fine ariv métisé-konm nou kréol-mé ék sistèm politik kapitalis, fine organizé konm an Erop, ék larmé, zénéral, kapitèn, fizi, mitrayèt ; zot i koz éspaniol ! Lo zindiin dorizine lé éksploité po rékolt koton konm zésklav, pa péyé, pa nouri konm i fo.

Sé la ké dé zindiin i di « i fo fé in manièr po arèt sa » ; aprann léspaniol, konèt koman larmé an fas i fonksione po pièz a zot ék moyin natirèl ; ziskà dan la Bib, i trouv zidé révolisyonèr. Moïz la tir son pèp ésklav dépi lézip po aminn a zot an Israël !
Lènmi i koz fransé alon aprann fransé ; lénmi i koz alman alon aprann alman.
A nou si ni vé débat èk Madagaskar, alon aprann malgas. A koz mon zanfan i apran pa portigé lékol po li giny vizit Mozanbik !
Batayi a arm égal, nou va ganié !

 Justin 


Kanalreunion.com