Oté

« Bate dolo » - In kozman pou la rout

Justin / 30 octob 2015

Souvan-défoi, moin la vi d’moun apré bate dolo dann résif Sin-Lé. Nana lontan pars koméla, mi pans pa sa lé ankor otorizé sa par raport lo park marin. Touléka, mi rapèl ankor tout in kantité d’moun sapate dsi z’ot pyé, in lanba pou kashyète z’ot l’intimité. Shakinn l’avé in baton épi dé dan la bann téi anbar poison avèk in tramail. Dopi la gar Sin-Lé ziska la zandarmri zot té i bat dolo épi té i rafal poisson.

Poukoué « bate dolo » ? Pars avèk lo baton zot téi bate dsi la mèr é mi pans lo poisson, par la pèr, téi fish po tramay kol azot d’dan. Kan té fini téi partaz lo poisson rant lo bann batèr d’lo.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Rod in n’afèr pou mète la dsi ! Zot va oir, ké rant, ni pé z’ète, tazantan, dakor rantre nou.

Nb Akoz té i mète lanba olèrk mayo ? Pars lo d’mèr I détinn linj. Konm bann péshèr l’avé poin larzan an gaspiy zot téi ashté pa mayo pou rant dann lo d’mèr.


Kanalreunion.com