Oté

« Bate lo fèr kan li lé sho ! »

In kozman pou la rout

Justin / 3 zwin 2016

Alon bate lo fèr kank li lé sho ? Sa nana dann lo shanté l’internasyonale. Mon kamarad Denis i shant sa shak foi nana in manifèstasyon é li shant bien, mi pé dir azot. Lo fèr kan lé sho ? Mi koné pa si dann z’ot kartyé l’avé in maréshal féran : in souflé té i done do fé, é kan lo fèr té rouj la té bon pou fé kisoi in fèr pou la pate bèf osinonsa la pate shoval, té vré osi pou sèrkl in rou d’sharète. Donk si lo fèr lé sho, lé pli fasil travaye ali ké si li lé fré. Pou moin sa i vé dir, kan lo zafèr lé paré, sé l’èr k’i fo déklansh lo mouvman, fèr sak nana a fèr, pars si ou i atann k’i frédi ou i ariv ar pa la gar. Ala koman mi oi lé shoz é mi pans zot i oi sa konm moin zot osi. Alé, ni rotrouv pli d’van, domin. Ni rotrouv, mon bann dalon !


Kanalreunion.com