Oté

Bien, asiréman,
pou son prop kart de vizit !

Justin / 23 avril 2013

Mésié Lurel la done in mision dépité-mèr Sin-Zosèf pou fé propozision dsi l’anploi dan bann péi l’Outre-mèr. Son shoi lé in pé étonan ! Pou kosa ? Pou in bonpé rézon.

Dabor inn, sé lo ga la fé in mouvman konm ki diré in pé kont son prop Parti sosialis. La prèv ? Li vé prézant kandida kont sèt Parti sosialis. Dizon, ala in minis i vien pik kouto dann do son prop parti isi La Rénion. Lo patriotism de parti lé pa tro for dann parti la... sof kan i fo poz in lanspèk Parti kominis, kisoi dan la Frans, kisoi isi.
In dézièm rézon, dan son mouvman, lo dépité i asosié avèk Michel Vergoz, lo boug la done La Réjion in sèrtin Didier Robert, épi la bat la min pou lo boug la kas tram-trin épi lo plan Paul Vergès l’avé fé pou dévlop l’ékonomi épi l’anploi dan La Rénion... Arzout ankor èk sa, si mi tronp pa, kan Sarkozy la fé lo z’Éta zénéro, moin la pa antann li l’avé z’idé pou La Rénion : son parti la pa maye la-dan, li mèm té pa la èk sa. Mi pans li té konm martin ki kouzi. Zot i pans sèrièzman in ga l’avé poin z’idé l’ané 2009 nora zi’dé zordi ? Moin na doutans, mé alon atann épi nou va oir.
Déza in n’afèr, lo minis Lurel, kan li la konfié in mision lo dépité an késtion, sa i vé dir li rokoné lo bann mézir gouvèrnman sosialis la fine fé voté, la pa sa va tir anou dann malizé. Donk, si lé bon fé la propagann la dsi, i fo sirtou pa kroir va fé mirak èk sa. Lo dépité li mèm, konm i di, li pans pa li sava invant lo tièd, vi k’li di, si li niabou trouv kat-sink mézir, sar déza bien... Bien pou li mèt dsi son kart vizit, mé pa forséman pou lo vint-nèf pour san bann Rénioné dann shomaz.

NB : I fo dir, mésié Hollande l’avé promèt mézir éspésial pou La Rénion... dan son diskour Sin-Lui. Déza i fodré nout dépité é lo minis i komans par lir diskour-la. In bon l’éktir, fransh vérité.

Justin


Kanalreunion.com