Oté

Biento papyé v’arivé, donk sar l’èr la vérité ! Konm pa !

Justin / 20 févrié 2015

Dann in moi ni sar voté pou ronouvèl konsèy zénéral sou in n’ot nom… konsèy départmantal. Ni sava mète anlèr sinkant pèrsone, vin-sink mé syé épi vinn-sink madam : sa i apèl la parité é sa sé in bone shoz. Mé sak lé moin klèr sé pou kèl pouvoir : mèm pouvoir ké konsèy zénéral ? Sirman pa. Pou plis pouvoir ? La pa sa non pli. Poi moins pouvoir ? Mi pans plitosar sa... Touléka sé sak mi kroi. Pars boudikont, gouvèrnman la pa kass sa tète pou pran in désizyon pou La Rényon é bann dépité kan zot la voté, zot la vote pou lé z’ot é pa pou nou.

Donk, ni vé ni vé pa kan v’ariv loi d’avril nora in l’asanblé nèv avèk sinkant pèrsone. Pou fèr koi ? Mi poz la késtyon, mé moin na poin la répons. Ni koné lo bann kandida, ni sipoz zot na in program é lo program v’ariv domin dann nout boit-o-lèt. Si ni gingn in pti tan nou va lir lo program ; si nou na la shans, pétète koté l’androi ni arès nora in rényon , donk nou va antann inn-dé tirad diskour lo van va amèn ziska nout zorèy. L’èr-la, nou va oir kosa tout bann kandida nana konm program.

Si moin la pa bien konprann, moin v’alé rod dann l’anvlop, kan li v’arivé..pou moin konète, kèl sé lo program lé inn épi lé zot. Mi éspèr m’a trouv mon bonère-konm i di !- m’a trouv lo pour épi m’a trouv lo kont, m’a trouv sak mi gard épi m’a trouv sak mi jète… kan papyé v’arivé. Konm pa !


Kanalreunion.com