Bilimbi la di : « Mang karote lé èg ! »

Na in pé d’moun i koz la boush rouvèr. Sa i vé dir, mèm si zot na poin gran-shoz pou dir, i fo zot i koz. Mèm pou pa di riyin, i fo zot i koz kant mèm. In pé i pans, kan zot lé anparmi, i fo zot i maye dann in diskisyon, mèm si zot lé pa si tèlman kalifyé pou kozé. Na in boug lé minis l’Ékonomi dann gouvèrnman la Frans i apèl Baroin... Zot i koné, so boug i mèt la moulir dan la voi pou li kozé. I diré li anprèt la voi avèk in ot moun pou li kozé.

Donk, bononm-la, fi-t’in-tan, sa lété sogrétèr l’Éta l’Outre-mèr. Lété i tonm dann tan sikoungounya. In zournalis i poz ali in késtyon dsi maladi-la, é li réponn : la pa bézoin trakasé, sa in l’éspès grip. Ou i gingn la fyèv sink zour par-la épi out kor i tonm dos. La maladi lé fini. Aprésa, li rant dann son gran zoizo an fèr épi li rotourn dann Paris. Ay ! ay ! ay ! lo maladi la fou anou in dékoksyon, mi rakont pa zot... pars zot osi, zot i koné. Plis dé san sinkant mil moun i tonm malad ; in takon d’moun i gingn la mor, é sak i guéri, zordi ankor, la maladi, zot i san lé la. Kisoi par la tablatir zot i gingn dann z’artikilasyon. Kisoi par zot kardyak ké la lévé. Kisoi ankor par d’ot maladi. A mésyé Baroin, i vo myé fèrm son také, é domoun i pran aou pou in kouyon, ké rouv out boush, é aprésa toulmoun lé sir ou lé kouyon pou vréman.

Kant in moun lé konmsa, li na in vré karyèr pou améné dann kozman initil. Ala ké nana dé zour, toulmoun i antan dir, l’ékonomi la Frans i rant an résésyon, konm l’ané dèrnyèr, a pépré mèm dat ké l’ané pasé, épi konm in bonpé péi l’Erop. Sépa kosa i spas dan son tèt. Olèrk défann l’ékonomi la Frans, ala ké li pas kal bann z’Anglé. Ala ké li di, dan la kriz, lé pli valab èt Fransé ké z’Anglé. Zot i konpran kèl sharivari sa i mèt rant bann Fransé épi bann z’Anglé, alé oir, inn konm l’ot, lo kanar lé noir. Kèl lé pli noir ? Sa mi koné pa, mé mi pé ofèr mèsyé Baroin in pti patoi. In pti patoi k’i di konmsa : « Bilimbi la di : mang karote lé èg ! ».

NB : Zot i koné bilimbi... koman sa lé èg ? Zot i koné mang karote, koman sa lé dos ? Donk zot i konpran in pé lo sans mon patoi. Mi lès azot fé travay zot koko dsi sa.

Justin