Oté

Bilinbi la di : mang karot lé èg

Justin / 3 novembre 2012

Lé ga ! Mi pans zot i koné bilinbi ? I fo pa konfonn ali avèk jirinbèl, pars lo promyé i done pti frui jone é bann frui i sharj dsi lo tron épi bann bransh, lo dézyèm i done bann pti frui alonzé é i sharj pa konm l’ot. Moin lé sir zot i koné mang karot : sèt-la mi koné bien, é la pa rienk zordi moin la manj ali an rougaye, an salad, èk piman de sèl… moin la mèm manz ali mir, mé mi trouv son filas i fatig in pé mon mashoir. Tout fason, bilinbi konm jirinbèl, sa lé èg vèy pa koman, si tèlman lo misk dann koin boush i diré i sava bloké kan ou i manj sa. Mang karot, kan sa lé mir, lé dou, lé dou, vèy pa koman.

L’èr-la, kan ou i di konmsa : « Bilinbi la di : mang karot lé èg ! », ou i apèrsoi nana konm in n’afèr i kol pa bien. Pars si, konm mi koné, sé lo bilinbi k’lé èg, mi oi pa pou kosa li krétik mang karot, in n’afèr si gayar, si gouté, si bon pou la boush. Donk, si li di sa, sé pars li vé fé pas in mésaz. Mi pans, mésaz-la la pa in késtyonn rapor rant bann frui, mé in késtyonn rapor rant bann moun. Dann kozman an fransé dé foi i di : « I oi la paye dann zyé lo voizin, i oi pa lo boi piké dan son prop zyé ! » . Donk, i oi défo lé zot, mé i oi pa out prop défo... Sa sé in n’afèr lé vré an zénéral.

Astèr, si ni vé koz dsi bann rapor dan la politik, dé foi i romark na in pé i di lo kontrèr d’la vérité é sa i fé pa zot arien. Mon papa k’lété in kominis fran té i di souvan, li èm pa bann mantèr, é mi kroi li la done amoin sa konm éritaz : mantèr la pa mon kamarad ! Dan la vi, dann travay, dan la politik, dan la rolizyon, dan l’édikasyon an zénéral. Lé vré, na in pé i pans, demoun na in droi pou mantir, é si zot i manti, par avans, zot i done azot l’absolisyon. Konbienn foi, dan la politik, moin la lir dsi la tèt in pé, zot té apré kalkil mantèr, té apré sharj delo a tor dsi in moun. Mé sa té fé dsi zot konm delo dsi la plime kanar, konm pou bien aprouv la moral, mi tir dan nout patoi moin la marké an o la.

Justin


Kanalreunion.com