Oté

Bilinbi la di : « Mang karote lé èg ! »

Justin / 15 novanm 2016

Sa sé in késhoz moin la fine ansèrv dann mon kozman pou la rout. Mé oplis mi tourn sa dann mon tète, oplis mi avèy demoun, oplis mi pans provèrb-la sa ou i pé ansèrv asé souvan pars demoun i kritik a-tor, an travèr, sa i mank pa…

Si ni pran dann la karyèr Paul Vergès, inn-dé poinn ropère : ni pé dir l’ané 1959 kan la fé lo kongré pou fé énète lo Parti Kominis Rényoné, sé lo promyé foi k’i ansèrv lo mo « lang » pou dézign lo kréol rényoné alé oir pou in pé napoin lontan sa lété in patoi, mèm pou in minis La Répiblik, in patoi sinpatik.

Si ni pran lo tram-trin la plipar d’moun i rokoné sa sé in n’afèr La Rényon la bézoin toulbon épi té i doi rann anou in gran sèrvis-sirtou kan nana in déboluaz galé dsi la rout konm l’ariv yèr. Na in pé i kontinyé dir, l’avé poin l’arzan k’i falé pou fèr sa. Mansonz biensir, mé konm mi di mantèr la zanm lé kourt.

Astèr i parl galman la mcur : ni koné kosa sa n’oré pèrmète anou pou ète bien plis ranségné dsi nout l’istoir é l’istoir nout popilasyon avèk demoun i sort partou pou fé nout pèp. Mé na in pé la trouv sa téi plé pa zot pars pou zot l’albosantri, sé z’ot sèl fil rouz dann la nésans nout pèp rényoné.

Mi arète la mé sé pou dir azot moin la antann Marjie dann in l’émisyon é sé èl k’i fé so bann kritik moin la mark an-o la. Sé èl ké la trouv, la pa si lontan ké sa, nout lang kréol rényonèz sé in patoi sinpatik. Sé mèm èl ké la di èl té i san pa èl fasiné par Paul Vergès é mi pans pa nout kamarad nora vouli in zour rode fasine demoun. Bilinbi la di : mang karote lé èg. Mi trouv sa i va bien avèk désèrtin.


Kanalreunion.com